Նախագահ Խաչատուրյանը Ռումինիայի դեսպանի հետ քննարկել է համագործակցության ընդլայնումը

Ազգային տոնի՝ Ռումինիայի Միավորման օրվա կապակցությամբ նախագահ Վահագն Խաչատուրյանը ընդունել է Ռումինիայի դեսպան Կորնել Իոնեսկուին․ կողմերը քննարկել են հայ–ռումինական հարաբերությունների ընդլայնման հնարավորությունները՝ առանձնապես շեշտելով տնտեսական, քաղաքական և ոլորտային համագործակցության խորացումը։

«Շնորհակալություն հայտնելով ընդունելության և բարեմաղթանքների համար՝ դեսպան Կորնել Իոնեսկուն նշել է, որ շարունակելու է իր ջանքերը՝ ուղղված Հայաստանի և Ռումինիայի միջև համագործակցության ընդլայնմանն ու խորացմանը։

Հանդիպման ընթացքում քննարկվել են երկու երկրների միջև փոխգործակցության առաջմղման նպատակով նախաձեռնությունների և քայլերի ակտիվացման հարցեր։ Երկուստեք կարևորվել է տնտեսական համագործակցության զգալի ներուժի լիարժեք իրացումը, ինչպես նաև երկու երկրների խորհրդարանների միջև կապերի ընդլայնումը։

Անդրադարձ է կատարվել կրթության և գիտության, բարձր տեխնոլոգիաների, էներգետիկայի, քաղաքացիական ավիացիայի և այլ ոլորտներում համատեղ ծրագրերի իրագործման հնարավորություններին։ Շեշտվել է նաև Եվրամիության հարթակում համագործակցության խորացման կարևորությունը։

Հատուկ ընդգծվել է Երևան-Բուխարեստ ուղիղ թռիչքների նշանակությունը, որոնք նպաստում են Հայաստանի և Ռումինիայի միջև տնտեսական, զբոսաշրջային և մարդկային կապերի ամրապնդմանը։

Հանդիպմանն անդրադարձ է կատարվել նաև գալիք տարում Հայաստանում կայանալիք երկու կարևոր միջազգային միջոցառումներին՝ Եվրոպական քաղաքական համայնքի գագաթաժողովին և Կենսաբազմազանության վերաբերյալ ՄԱԿ-ի COP-17 համաժողովին, ընդգծելով դրանց հաջող կազմակերպման ու արդյունավետության ապահովման համար գործընկեր երկրների աջակցությունն ու ներգրավվածությունը։

Հանդիպման ընթացքում կողմերը մտքեր են փոխանակել տարածաշրջանային և միջազգային ընթացիկ գործընթացների շուրջ՝ կարևորելով առկա մարտահրավերների հաղթահարումը խաղաղ բանակցությունների և ժողովրդավարական սկզբունքների ամրապնդման միջոցով»,- ասված է հաղորդագրությունում։