26.04.2026 | 14:19
Կվերականգնվի 19-րդ դարի «Քարակարմունջ» կամուրջը
Առողջապահության ոլորտում հեղափոխություն անելու հարցում Ձեր կողքին ենք. ամերիկահայ բարերար Մայք Սարյանը՝ նախարարին
Հասարակություն
31.10.2018 | 16:11
Առողջապահության նախարարի պաշտոնակատար Արսեն Թորոսյանն ընդունել է «Prime Healthcare» ընկերության նախագահ, ամերիկահայ բարերար Մայք Սարյանին, ով ԱՄՆ առողջապահական ոլորտի հայտնի ներկայացուցիչ է և ԱՄՆ 14 նահանգների 45 հիվանդանոց ներառող խոշոր ցանցի ղեկավար: Նախօրեին վարչապետի պաշտոնակատար Նիկոլ Փաշինյանի հետ հանդիպման ընթացքում պայմանավորվածություն էր ձեռք բերվել Սարյանի առաջարկած մի շարք գաղափարներ և համատեղ նախագծեր առավել առարկայորեն քննարկել արդեն առողջապահական գերատեսչությունում:
«Առողջապահության ոլորտում հեղափոխություն անելու հարցում Ձեր կողքին ենք»,-շեշտել է Սարյանն ու Թորոսյանին առաջարկել իր աջակցությունը` ամերիկյան առողջապահական համակարգում կիրառվող բժշկական չափորոշիչները Հայաստանում ներդնելու ու դրանցով առաջնորդվելու հարցում: Այդ չափորոշիչները վերաբերում են թե առողջապահական հաստատությունների շենքային պայմաններին, թե բուժման ընդհանուր գործընթացներին:
Ամերիկահայ բարերարը հետաքրքրված է նաև ամերիկյան արտադրության բժշկական նշանակության ապրանքներ, դեղեր բերելու, Հայաստանում փաթեթավորելու, վերավաճառելու ու արտահանելու հարցում:
«Ինձ համար երազանք է` Հայաստանում հիմնել լավագույն չափորոշիչներին համապատասխան, առաջատար գիտելիքահեն բուժկենտրոն` այսպիսով նպաստելով նաև առողջապահական տուրիզմի զարգացմանը»,-ասել է Սարյանը` վստահեցնելով, որ պատրաստ է իր նպաստը բերել համակարգի զարգացմանն ու այս գաղափարին:
Սարյանին հետաքրքրել են Թորոսյանի դիտարկումներն ու իր գաղափարները կյանքի կոչելու առաջարկները: Հայաստան այցի շրջանակում առաջիկա օրերին արդեն որոշակի քննարկումներ և այցեր կկազմակերպվեն:
Հայ բարերարը հետաքրքրվել է նաև այս սեպտեմբերին Հայաստանին նվիրաբերված մեծաքանակ բուժտեխնիկայի և օժանդակ սարքավորումների բաշխման գործընթացով` տեղեկանալով, որ օրերս արդեն դրանք կտրամադրվեն հիմնականում մարզային բուժհաստատություններին:
Հայաստանյան առողջապահական համակարգին շարունակական աջակցության, ինչպես նաև կառավարման գործում նշանակալի ավանդի համար նախարարի պաշտոնակատարի անունից Մայք Սարյանին հայտարարվել է շնորհակալություն, իսկ բարերարը պարգևատրվել է նաև նախարարության հուշամեդալով:
