24.02.2026 | 15:43
«Մոլորակների մեծ շքերթ»՝ փետրվարի 28-ին
ԱՄՆ-ից թմրանյութ պարունակող էլեկտրոնային սիգարետ են ներմուծում Հայաստան, Եվրոպայից՝ դեղահաբեր. ՊԵԿ-ի տվյալները
Հասարակություն
31.10.2018 | 11:53
Պետեկամուտների կոմիտեի (ՊԵԿ) մաքսանենգության դեմ պայքարի վարչության աշխատակիցները 2018 թվականի ընթացքում մաքսային իրավախախտման 126 դեպք են կանխել, որից 70-ով քրեական գործեր են հարուցվել: Այս մասին այսօր՝ հոկտեմբերի 31-ին, տեղի ունեցած ասուլիսում հայտնեց ՊԵԿ մաքսանենգության դեմ պայքարի վարչության պետ Վարդան Վարդանյանը:
Ըստ նրա՝ թմրամիջոցների և հոգեմետ միջոցների մաքսանենգության աննախադեպ խմբաքանակ է հայտնաբերվել:
«Հանցագործները փորձել են Հայաստան ներկրել ավելի քան 4 կգ կոկաին, 0.5 կգ հերոին, ավելի քան 3 գրամ մեթադոն, 2 կգ ափիոն, 6 գրամ հաշիշ, հաշիշի յուղ պարունակող 290 հատ էլեկտրոնային սիգարետ, ավելի քան 4 կգ մարիխուանա, թմրանյութերի պարունակությամբ քաղցրավենիք:
Կանխվել են նաև թմրանյութերի կանխման փորձեր՝ մոտ 8 կգ ափիոն և ավելի քան 13 կգ մետամֆետամին»,- թվային տվյալներ ներկայացրեց Վարդան Վարդանյանը:
Թմրանյութերի մաքսանենգության դեպքերը, նրա խոսքով, հայտնաբերվել են հիմնականում փոստային առաքանիներում: Ընդ որում, ԱՄՆ-ից հիմնականում փորձ է արվել ներմուծել հաշիշի յուղ տեսակի թմրամիջոց պարունակող էլեկտրոնային սիգարետներ, իսկ Եվրոպայից՝ հոգեմետ նյութ և թմրանյութ պարունակող դեղահաբեր:
«Փոստային առաքանիներում հայտնաբերել ենք ավելի քան 22 կգ դեղորայք, որոնցից 3 հազար դեղահաբը՝ թմրանյութի և հոգեմետ նյութի պարունակությամբ»,- հավելեց ՊԵԿ մաքսանենգության դեմ պայքարի վարչության պետը՝ հիշեցնելով, որ փոստային առաքանիներով դեղորայքի տեղափոխումն արգելվում է:
