29.06.2026 | 21:00
Վարչապետին առաջարկել եմ՝ ՔՊ-ն և արևմտյան թևի ուժերը մեկ ցուցակով մասնակցեն ընտրությանը, բայց մերժել է․ Արամ Սարգսյան․ ՏԵՍԱՆՅՈՒԹ
Պաշտոնական Բաքուն՝ Երևան Ալիևի հնարավոր այցի մասին
Քաղաքականություն
07.11.2025 | 18:09
Ադրբեջանի ԱԳՆ մամուլի ծառայության ղեկավար Այխան Հաջիզադեն տեղական լրատվամիջոցների հետ զրույցում անդրադարձել է հարցին, թե ինչ մակարդակով Բաքուն կմասնակցի 2026 թվականին Երևանում կայանալիք Եվրոպական քաղաքական համայնքի գագաթնաժողովին։
«Եվրոպական Միության գագաթնաժողովները կարևոր են քաղաքական երկխոսության ամրապնդման, էներգետիկայի և անվտանգության ոլորտում համագործակցության զարգացման, տնտեսական ինտեգրման և գլոբալ մարտահրավերներին արձագանքելու առումով։ Ադրբեջանի նախագահի օգնական Հիքմեթ Հաջիևը, պարզաբանելով նախագահ Իլհամ Ալիևի՝ Երևանում կայանալիք Եվրոպական համայնքի գագաթնաժողովին մասնակցության հարցը, նշել է, որ Ադրբեջանի նախագահը պաշտոնական հրավեր չի ստացել այս միջոցառման կապակցությամբ, և Ադրբեջանի մասնակցությունը գագաթնաժողովին ամենաբարձր մակարդակով քիչ հավանական է»,- ասել է նա։
Բացի այդ, Հաջիզադեն դժգոհել է Հայաստանում ԵՄ դիտորդական առաքելությունից։
«Ադրբեջանը բազմիցս լուրջ մտահոգություն է հայտնել Հայաստանում ԵՄ դիտորդական առաքելության գործունեության վերաբերյալ, որը հակասում է ձեռք բերված նախնական պայմանավորվածություններին»,- ասել է նա։
Ըստ Հաջիզադեի՝ դիտորդական առաքելությունը, իբր, լայնորեն օգտագործվել է որպես Ադրբեջանի դեմ քարոզչական գործիք, ինչը հակասում է նրա հայտարարած նպատակներին՝ խթանել տարածաշրջանային կայունությունը և կառուցել վստահություն Ադրբեջանի և Հայաստանի միջև։
«Հաշվի առնելով վերը նշվածը՝ հայ-ադրբեջանական սահմանին երրորդ կողմերի չտեղակայումը մենք առաջ ենք քաշել որպես խաղաղության համաձայնագրի հիմնական դրույթներից մեկը և, ի վերջո, ընդունվել է։ Երբ մեր երկիրը խոսում է երրորդ կողմերի մասին, դա ներառում է նաև Եվրոպական Միության դիտորդական առաքելությունը, և մեր դիրքորոշումն այս հարցում հայտնի է Հայաստանին՝ որպես այս առաքելությունը հյուրընկալող կողմի։ Մենք հույս ունենք, որ խաղաղության համաձայնագրի ստորագրումից հետո Հայաստանը կկատարի իր պարտավորություններն այս շրջանակում»,- ասել է Հաջիզադեն։
Հավելենք, որ ավելի վաղ ադրբեջանական աղբյուրներն էին հայտնել՝ Ալիևը չի այցելի Երևան՝ Եվրոպական քաղաքական համայնքի գագաթնաժողովին մասնակցելու։
Թարգմանությունը՝ Էմմա Չոբանյանի
