Ալիևն ու Կոշտան վերահաստատել են ընդհանուր ռազմավարական նպատակը՝ խաղաղ Հարավային Կովկաս

Ադրբեջանի նախագահ Իլհամ Ալիևն ու ԵՄ Խորհրդի նախագահ Անտոնիո Կոշտան վերահաստատել են իրենց ընդհանուր ռազմավարական նպատակը՝ խաղաղ, կայուն, փոխկապակցված և բարգավաճ Հարավային Կովկաս՝ առանց բաժանարար գծերի, նաև ողջունել տարածաշրջանում դրական զարգացումները, մասնավորապես, Ադրբեջանի և Հայաստանի միջև խաղաղության գործընթացի պատմական դինամիկան։ Այս մասին ասվում է Իլհամ Ալիևի և Անտոնիո Կոշտայի համատեղ հայտարարության մեջ։

Գոհունակությամբ նշվում են 2025 թվականի օգոստոսի 8-ի Վաշինգտոնի գագաթնաժողովի արդյունքները և հետագա քայլերը՝ երկու երկրների միջև հարաբերությունները կարգավորելու համար։ Եվրամիության Խորհրդի նախագահը վերահաստատել է ԵՄ-ի լիակատար աջակցությունը Ադրբեջանի և Հայաստանի ջանքերին՝ փոխադարձ երկխոսության միջոցով տարածաշրջանում կայուն խաղաղության հասնելու համար։

Ընդգծելով Ադրբեջանի և Եվրամիության միջև գործընկերության ռազմավարական բնույթը՝ նախագահները վերահաստատել են  իրենց հանձնառությունը՝ խորացնելու քաղաքական երկխոսությունը և գործնական համագործակցությունը՝ հիմնվելով վերջին բարձր մակարդակի հանդիպումների ընթացքում ձեռք բերված դրական դինամիկայի վրա, այդ թվում՝ անվտանգության, էներգետիկայի և տրանսպորտի ոլորտներում։ Այս համագործակցությունը համապատասխանում է երկու կողմերի փոխադարձ շահերին և նպաստում է խաղաղության, կայունության, տրանսպորտային կապի և կայուն զարգացման ամրապնդմանը Սև ծովի, Հարավային Կովկասի և Կենտրոնական Ասիայի ավելի լայն տարածաշրջաններում։ Նրանք նաև նշել են Ադրբեջանի կողմից Ղարաբաղում հետհակամարտային լայնածավալ վերականգնման և զարգացման ջանքերը։

Ադրբեջանի նախագահը և Եվրոպական Խորհրդի նախագահը նշել են Ադրբեջանի կարևոր դերը տարածաշրջանային կապի ապահովման գործում, մասնավորապես, Միջին միջանցքի շրջանակում, որն ամրապնդում է Սևծովյան տարածաշրջանի, Հարավային Կովկասի և Կենտրոնական Ասիայի միջև տրանսպորտային, առևտրային, էներգետիկ և թվային կապերը։ Եվրամիությունը վերահաստատել է իր հանձնառությունը Ադրբեջանի հետ համագործակցելու տրանսպորտային կապի ոլորտում՝ «Գլոբալ դարպաս» նախաձեռնության և այլ համապատասխան մեխանիզմների շրջանակներում, ներառյալ՝ Նախիջևանի Ինքնավար Հանրապետությունում երկաթուղիների արդիականացման աջակցությունը, ինչպես նաև TRIPP նախագծի իրականացման շարունակական ջանքերը:

Նշելով էներգետիկայի ոլորտում իրենց երկարաժամկետ ռազմավարական գործընկերությունը՝ նախագահները վերահաստատել են Ադրբեջանի դերը որպես Եվրոպայի էներգամատակարարման աղբյուրների դիվերսիֆիկացման հուսալի գործընկեր և արտահայտեվ իրենց հանձնառությունը՝ շարունակելու 2022 թվականին ստորագրված էներգետիկայի ոլորտում ռազմավարական գործընկերության վերաբերյալ փոխըմբռնման հուշագրի իրականացումը։Նրանք ընդգծել  են Հարավային գազային միջանցքի խորհրդատվական խորհրդի և կանաչ էներգիայի վերաբերյալ հանդիպման կարևորությունը, ինչպես նաև վերականգնվող էներգիայի, այդ թվում՝ քամու և արևային էներգիայի արտադրության ոլորտում համագործակցության ընդլայնման և ցանցային փոխկապակցման նախագծերի իրականացման ներուժը, ինչպիսին է Սև ծովի ստորջրյա էլեկտրահաղորդման մալուխի նախագիծը։

Նախագահները շեշտել են  պաշտպանության և անվտանգության ոլորտներում համագործակցության խորացման կարևորությունը՝ կազմակերպված հանցավորության, ահաբեկչության, ծայրահեղականության, զենքի և թմրանյութերի անօրինական շրջանառության, փողերի լվացման, մարդկանց առևտրի և անօրինական միգրացիայի նման ի հայտ եկող սպառնալիքներին հակազդելու համար։

Ընդգծվում է թվային փոխակերպման և նորարարության ոլորտում համագործակցության ամրապնդման կարևորությունը։ Նրանք նաև ողջունել են Վիզային ռեժիմի դյուրացման համաձայնագրի շարունակական իրականացումը:

Թարգմանությունը՝ Էմմա Չոբանյանի