10.06.2026 | 23:29
Հունիսի 7-ին կայացած ԱԺ ընտրությունները աննախադեպ էին. «Նոր ուժ»-ի հայտարարությունը
ՀՀ-ն ավարտին է հասցնում Հնդկաստանի հետ Sukhoi Su-30MKI կործանիչների գնման 2.5-3 միլիարդ արժողության պատմական գործարքը. IDN
Քաղաքականություն
30.10.2025 | 19:14
Հայաստանն ավարտին է հասցնում Հնդկաստանի հետ պատմական գնման գործարքը՝ HAL-ի կողմից արտադրված Sukhoi Su-30MKI բազմաֆունկցիոնալ կործանիչների ձեռքբերման համար, գրում է Indian Defense News-ը։
Ըստ հրապարակման՝ բանակցությունների առաջադեմ փուլում գտնվող այս համաձայնագիրը դիտարկվում է որպես ռազմավարական հակակշիռ Ադրբեջանի կողմից վերջերս պակիստանյան ծագում ունեցող 40 JF-17C Block-III կործանիչների գնմանը։
Նշվում է, որ գործարքը նշանակում է հնդկա-հայաստանյան պաշտպանական համագործակցության խորացում, որը հաջորդում է վերջին տարիներին կնքված բազմաթիվ զենքի պայմանագրերին, այդ թվում՝ Pinaka հրթիռային համակարգերին, Swathi հակամարտկոցային ռադարներին և առաջադեմ հակատանկային զինամթերքին: Su-30MKI-ների մատակարարումը զգալիորեն կբարձրացնի Հայաստանի զսպման և հեռահար օդային մարտական հնարավորությունները տեխնոլոգիապես արդիականացված JF-17 նավատորմի դեմ։
Հնդկաստանի համար այս զարգացումը պաշտպանական արտահանման ոլորտում լուրջ առաջընթաց է, որն ընդգծում է Hindustan Aeronautics Limited-ի աճող համաշխարհային ներկայությունը:
Գործարքը, որի արժեքը, ենթադրաբար, կկազմի 2,5-3 միլիարդ դոլար, հավանաբար, առաջին փուլում կներառի 8-ից 12 Su-30MKI ինքնաթիռի մատակարարում, ինչպես նաև դրան կից ուսուցում, ցամաքային աջակցություն և զենքի անհատական ինտեգրացիա: Մատակարարումները նախատեսվում է սկսել 2027 թվականի վերջին, իսկ վերջնական հանձնումը 2029 թվականին՝ հետևելով HAL-ի ներկայիս արտադրական պարտավորություններին Հնդկաստանի ռազմաօդային ուժերի համար։
Լրատվամիջոցն ընդգծում է, որ այս ձեռքբերումը հաջորդում է 2020 թվականից ի վեր ստորագրված մի շարք հնդկա-հայկական պաշտպանական պայմանագրերի։ Այս քայլը նշանակում է Երևանի շարունակական անցումը դեպի հնդկական պաշտպանական տեխնոլոգիաներ՝ շարունակվող տարածաշրջանային ռազմական գործողությունների պայմաններում Ռուսաստանից կախվածությունից դուրս դիվերսիֆիկացնելու համար:
Հայկական Su-30MKI տարբերակը, ինչպես սպասվում է, կներառի տեղական հնդկական արդիականացումներ, ինչպիսիք են Uttam AESA ռադարը, Astra MK-1 և MK-2 տեսողական հեռահարության հրթիռները, ինչպես նաև DRDO-ի ռադիոէլեկտրոնային պատերազմի համալիրը: Այս բարելավումները ինքնաթիռին կտան իրավիճակային գերազանց իրազեկություն և մարտական դիմացկունություն՝ համեմատած JF-17C-ի չինական KLJ-7A ռադարի և PL-15 հրթիռային համակարգերի հետ։Այս կոնֆիգուրացիան կարող է հայկական Su-30MKI-ն դարձնել ինքնաթիռի մինչ օրս ամենաբարդ արտահանման տարբերակներից մեկը։
Նշվում է, որ սա նաև ամրապնդում է Հնդկաստանի ռազմավարական ազդեցությունը Կովկասի տարածաշրջանում՝ Նյու Դելիին դիրքավորելով որպես հուսալի անվտանգության գործընկեր՝ Թուրքիայի, Պակիստանի և Ռուսաստանի միջև աշխարհաքաղաքական դինամիկայի փոփոխության պայմաններում:
Ռազմավարական առումով ձեռքբերումն ընդգծում է Երևանի՝ Նյու Դելիի ուղղությամբ շրջադարձը որպես հիմնական պաշտպանական գործընկեր՝ Բաքվի և Անկարայի հետ շարունակվող լարվածության ֆոնին: Ընդգծվում է, որ Հնդկաստանի համար սա ամրապնդում է իր դիրքերը որպես զենքի հուսալի մատակարար Եվրասիական տարածաշրջանում և ամրապնդում է նրա աշխարհաքաղաքական ազդեցությունն այն թատերաբեմում, որն ավանդաբար գտնվում է Ռուսաստանի և Թուրքիայի ազդեցության տակ:
Թարգմանությունը՝ Էմմա Չոբանյանի
