Մադագասկարում նախագահի փախուստի ֆոնին` զինվորականները հայտարարել են երկրի իշխանությունը ստանձնելու մասին

Մադագասկարի զինվորականները ստանձնել են Հնդկական օվկիանոսում գտնվող կղզու վերահսկողությունը։ Այս մասին հայտարարել է բանակի գնդապետը՝ այն բանից հետո, երբ նախագահ Անդրի Ռաջոելինան փախել է արտերկիր՝ ցուցարարների և անվտանգության ուժերի հետ բախումների ֆոնին, նշում է Reuters-ը։

«Մենք ստանձնել ենք իշխանությունը»,- ազգային ռադիոյի եթերում ասել է գնդապետ Մայքլ Ռանդրիանիրինան, որը գլխավորել է զինվորականների ապստամբությունը, որոնք միացել են կառավարության դեմ հանդես եկող Z սերնդի ցուցարարներին։

Ռանդրիանիրինան հավելել է, որ զինվորականները լուծարում են բոլոր ինստիտուտները՝ բացի խորհրդարանի ստորին պալատից կամ Ազգային ժողովից, որը քվեարկել է Ռաջոելինայի իմփիչմենթի օգտին։

Մադագասկարի 51-ամյա նախագահը փորձել էր հրամանագրով լուծարել Ազգային ժողովը։

Չնայած ֆրանսիական ռազմական ինքնաթիռով մեկնելուն՝ Ռաջոելինան չի ցանկանում հրաժարական տալ  Z սերնդի մեկշաբաթյա բողոքի ցույցերին ֆոնին, որոնք դա էին պահանջում։

Նախագահական վարչակազմն անմիջապես չի արձագանքել Ռաջոելինի հայտարարություններին, բայց ավելի վաղ հայտարարել է, որ Ազգային ժողովի նիստը հակասահմանադրական է, ինչը նշանակում է, որ ցանկացած որոշում «անվավեր է»։

Ռաջոելինան ասել էր, որ տեղափոխվել է անվտանգ վայր՝ իր կյանքին սպառնացող վտանգների պատճառով: Ընդդիմության պաշտոնյան, ռազմական աղբյուրը և օտարերկրյա դիվանագետը Reuters-ին  հայտնել են, որ նա կիրակի լքել է երկիրը ֆրանսիական ռազմական ինքնաթիռով:

Ավելի վաղ Ֆրանսիայի նախագահ Էմանուել Մակրոնը հայտարարել էր, որ սահմանադրական կարգը պետք է պահպանվի, և չնայած Ֆրանսիան հասկանում է երիտասարդության դժգոհությունները՝ նրանք չպետք է շահագործվեն ռազմական խմբավորումների կողմից։

Ռաջոելինան մեկուսացված էր թվում CAPSAT-ի աջակցությունը կորցնելուց հետո, որն էլիտար ստորաբաժանում է, օգնել էր նրան վերցնել իշխանությունը 2009 թվականի հեղաշրջման ժամանակ։ Ռանդրիանիրինան CAPSAT-ի հայտնի հրամանատարներից է։

Ստորաբաժանումը միացել էր ցուցարարներին շաբաթավերջին՝ հայտարարելով, որ հրաժարվում է կրակել նրանց վրա և ուղեկցելով հազարավոր ցուցարարների մայրաքաղաք Անտանանարիվուի գլխավոր հրապարակում։

Թարգմանությունը՝ Էմմա Չոբանյանի