Մադագասկարի նախագահը ցույցերի ֆոնին հեռացել է երկրից «անվտանգ վայր»․ նա հրաժարական չի տա

Մադագասկարի նախագահ Անդրի Ռաջոելինան հայտարարել է, որ մահափորձից հետո ապաստանել է «անվտանգ վայրում»՝ անտեսելով իր հրաժարականի կոչերը, գրում է France 24-ը։

Սա նրա առաջին հրապարակային ելույթն էր այն բանից հետո, երբ ապստամբ բանակային ստորաբաժանումն աջակցել էր  կառավարության դեմ բողոքի ցույցերին, և հաջորդել այն հաղորդագրություններին, որ 51-ամյա առաջնորդը փախել է երկրից։

«Սեպտեմբերի 25-ից ի վեր եղել են իմ դեմ մահափորձեր և հեղաշրջման փորձեր։ Զինվորականների և քաղաքական գործիչների մի խումբ պլանավորել էր սպանել ինձ։ Ես ստիպված էի գտնել անվտանգ վայր՝ կյանքս պաշտպանելու համար»,- ասել է նա Facebook-ում ուղիղ եթերում՝ առանց բացահայտելու իր գտնվելու վայրը։

Բողոքի ցույցերը երկրում բռնկվել են էլեկտրաէներգիայի և ջրի տևական անջատումների դեմ, իսկ հետո վերաճել ավելի լայն հակակառավարական շարժման, որը պահանջում էր Ռաջոելինի հրաժարականը։ Մայրաքաղաք Անտանանարիվուի նախկին քաղաքապետ Ռաջոելինան կոչ է արել հարգել Սահմանադրությունը՝ անտեսելով հրաժարական տալու կոչերը։

«Ես առաքելություն ունեմ՝ լուծումներ գտնելու»,- ասել է նա։

Ռաջոելինան առաջին անգամ իշխանության է եկել 2009 թվականին՝ նախկին նախագահ Մարկ Ռավալոմանանայի տապալած ապստամբության հետևանքով հեղաշրջումից հետո։

Radio France Internationale-ը հայտնել էր, որ Ռաջոելինան շաբաթավերջին ֆրանսիական ռազմական ինքնաթիռով լքել է Մադագասկարը, սակայն ֆրանսիացի պաշտոնյաները չեն արձագանքել AFP-ի հաստատման հարցմանը։ Ֆրանսիայի նախագահ Էմանուել Մակրոնը, որը «մեծ մտահոգություն» էր հայտնել Մադագասկարում ճգնաժամի վերաբերյալ, նույնպես հրաժարվել է հաստատել դա։

Ռաջոելինան չորեքշաբթի օրվանից հանրությանը չէր ներկայացել։ Պետական ​​հեռուստատեսությամբ և ռադիոյով նախատեսված նրա ելույթը երկուշաբթի երկու անգամ հետաձգվել է, քանի որ զինված ուժերը փորձել են գրավել պետական ​​հեռարձակողի շենքը։

ՄԱԿ-ը հայտարարել է, որ Մադագասկարում բողոքի ցույցերի առաջին օրերին սպանվել է առնվազն 22 մարդ. ոմանք՝ անվտանգության ուժերի կողմից, ոմանք՝ հանցավոր խմբավորումների հրահրած բռնության հետևանքով: Ռաջոելինան վիճարկել է զոհերի թիվը՝ ասելով, որ անցյալ շաբաթ գրանցվել է «12 հաստատված մահ, և բոլորը գողեր և վանդալներ են»։

Ռաջոելինի փախուստի մասին լուրերի ֆոնին՝ կառավարությունը շաբաթ հայտարարել էր, որ նա մնացել է Մադագասկարում և զբաղվում է ազգային գործերով։ Նրա ելույթից առաջ ցուցարարները հայտարարել էին, որ ակնկալում են, որ նա կհրաժարվի պաշտոնից։

Վերջին անկարգությունները մտահոգություն են առաջացրել տարածաշրջանում։ Աֆրիկյան միության անվտանգության խորհուրդը կոչ է արել բոլոր զինված ուժերին «վերադառնալ իրենց սահմանադրական պարտականություններին և զերծ մնալ երկրի քաղաքական գործերին միջամտելուց»։

Թարգմանությունը՝ Էմմա Չոբանյանի