ԵՄ-ն առաջարկում է Իսրայելի նկատմամբ պատժամիջոցներ կիրառել Գազայում պատերազմի պատճառով

ԵՄ արտաքին քաղաքականության պատասխանատու Կայա Կալլասն առաջարկ է ներկայացրել՝ սահմանափակել Իսրայելի հետ առևտուրը և սահմանափակումներ կիրառել ծայրահեղ աջակողմյան իսրայելցի նախարարների նկատմամբ՝ կապված Գազայի պատերազմի հետ, գրում է DW-ն։

«Ես ուզում եմ շատ հստակ լինել՝ նպատակը Իսրայելին պատժելը չէ, նպատակը Գազայում մարդասիրական իրավիճակի բարելավումն է։ Պատերազմը պետք է ավարտվի։ Տառապանքները պետք է դադարեցվեն, և բոլոր պատանդները պետք է ազատ արձակվեն»,- ասել է Կալլասը։

Հստակ չէ՝ արդյո՞ք 27 անդամներից բաղկացած դաշինքի պետությունների մեծամասնությունը կողմ կլինի Կալլասի առաջարկած միջոցառումներին, չնայած ԵՄ-ն քննադատության է ենթարկվել պատերազմը դադարեցնելու հարցում Իսրայելի վրա ճնշում գործադրել չկարողանալու համար։

Գերմանիայի կառավարության խոսնակն ավելի վաղ հայտարարել էր, որ Բեռլինը տեղյակ է, բայց «դեռևս վերջնական կարծիք չի կազմել» առաջարկվող միջոցառումների վերաբերյալ։

Անցյալ շաբաթ Եվրահանձնաժողովի  նախագահ Ուրսուլա ֆոն դեր Լեյենը հայտարարել էր, որ ԵՄ-ն կդադարեցնի Իսրայելին վճարումները, և որ դաշինքի գործադիր մարմինն աշխատում է հետագա միջոցառումների ուղղությամբ։

Երեքշաբթի Իսրայելի արտաքին գործերի նախարար Գիդեոն Սաարը հայտարարել էր, որ ԵՄ-ի կողմից որոշ առևտրային արտոնությունների կասեցումն «անհամաչափ» և «աննախադեպ» է։ Իսրայելի բանակն էլ հայտարարել է, որ վերջին 48 ժամվա ընթացքում իրենց ցամաքային հարձակման շրջանակում «հարվածել են 150 ահաբեկչական թիրախի» Գազա քաղաքում։

Հիշեցնենք, որ Իսրայելը լայնածավալ ցամաքային հարձակում է սկսել՝ Գազան գրավելու նպատակով։

Թարգմանությունը՝ Էմմա Չոբանյանի