Ռուբիոն խոստացել է Իսրայելին ԱՄՆ-ի «անսասան աջակցությունը»

ԱՄՆ պետքարտուղար Մարկո Ռուբիոն Իսրայել կատարած այցի ժամանակ հայտարարել է, որ Վաշինգտոնը կշարունակի «անսասան աջակցություն» ցուցաբերել իր դաշնակցին Գազայի պատերազմում և կոչ է արել վերացնել ՀԱՄԱՍ-ը, գրում է France 24-ը։

«Գազայի ժողովուրդը արժանի է ավելի լավ ապագայի, բայց այդ ավելի լավ ապագան չի կարող սկսվել մինչև ՀԱՄԱՍ-ի վերացումը», – Իսրայելի վարչապետ Բենիամին Նեթանյահուի հետ համատեղ  ճեպազրույցում ասել է Ռուբիոն ու հավելել.

«Դուք կարող եք հույս դնել մեր անսասան աջակցության և հանձնառության վրա, որպեսզի դա իրականություն դառնա»։

Նեթանյահուն Ռուբիոյի այցը «հստակ ազդանշան» է անվանել այն մասին, որ Միացյալ Նահանգները Իսրայելի կողքին է, և գովաբանել է նախագահ Դոնալդ Թրամփին աջակցության համար՝ նրան անվանելով «Իսրայելի երբևէ ունեցած ամենամեծ ընկերը»։

Ռուբիոն քննադատել է Պաղեստինի պետությունը ճանաչելու Արևմուտքի ծրագրերը՝ ասելով, որ դրանք «քաջալերում » են ՀԱՄԱՍ-ին։

«ՀԱՄԱՍ-ը պետք է դադարի գոյություն ունենալ որպես զինված տարր, որը կարող է սպառնալ տարածաշրջանի խաղաղությանը և անվտանգությանը», -ասել է ԱՄՆ պետքարտուղարը։

Նա հավելել է, որ Վաշինգտոնը կշարունակի առավելագույն ճնշում գործադրել Իրանի վրա, որը աջակցում է պաղեստինյան զինյալ խմբավորմանը, մինչև Թեհրանը «չփոխի իր ուղղությունը»։

Ռուբիոն նաև Իսրայելին ասել է, որ Միացյալ Նահանգները աջակցում է Կատարի «կառուցողական դերին» Գազայի հարցում միջնորդության գործում՝ Իսրայելի կողմից հարվածից հետո։

Հավելենք, որ այսօր ավելի վաղ Ռուբիոն ու Նեթանյահուն Երուսաղեմում բանակցություններ էին անցկացրել։

Ի դեպ, հաղորդվում է, որ ԱՄՆ Մարկո Ռուբիոն երեքշաբթի օրը կմեկնի Կատար, մեկ շաբաթ անց այն բանից հետո, երբ Իսրայելը հարձակվել էր Դոհայում ՀԱՄԱՍ-ի վրա։

Թարգմանությունը Էմմա Չոբանյանի