Ռուբիոն Երուսաղեմում հանդիպել է Նեթանյահուին

ԱՄՆ պետքարտուղար Մարկո Ռուբիոն երկուշաբթի օրը Երուսաղեմում  հանդիպել է Իսրայելի վարչապետ Բենիամին Նեթանյահուի հետ՝ Վաշինգտոնի մտահոգությունների ֆոնին, որ Կատարում ավիահարվածները սպառնում են խափանել Գազայի հատվածում հրադադարի հաստատման ջանքերը:

The Times of Israel-ը հրապարակել է Բենիամին Նեթանյահուի գրասենյակի տարածած լուսանկարները․ դրանցում երկու պաշտոնյաները ժպտում են՝ չնայած հանդիպման շուրջ լարվածությանը, որը կապված է ԱՄՆ-ի դժգոհության հետ՝ Կատարում ՀԱՄԱՍ-ին հարված հասցնելու Նեթանյահուի որոշման հետ։

Ավելի ուշ Իսրայելի վարչապետի գրասենյակը հայտնել է, որ  Բենիամին Նեթանյահուն ավարտել է ԱՄՆ պետքարտուղար Մարկո Ռուբիոյի հետ իր աշխատանքային հանդիպումը։

Քննարկմանը մասնակցել են Իսրայելի ռազմավարական հարցերով նախարար Ռոն Դերմերը, արտաքին գործերի նախարար Գիդեոն Սաարը, ազգային անվտանգության խորհրդական Ցաչի Հանեգբին և Վաշինգտոնում ԱՄՆ դեսպան Եչիել Լեյթերը։ ԱՄՆ դեսպան Մայք Հաքաբին նույնպես ներկա է եղել  հանդիպմանը։

Նշվում է, որ Ռուբիոն այժմ Երուսաղեմում հանդիպում է իր գործընկեր Գիդեոն Սաարի հետ, որից հետո ԱՄՆ պետքարտուղարը և Նեթանյահուն հայտարարություններ կանեն լրատվամիջոցների համար։

ԱՄՆ պետքարտուղար Մարկո Ռուբիոն կիրակի օրը երկօրյա այցով ժամանել է Իսրայել՝ քննարկելու Գազայի հակամարտության ապագան և պատանդների ազատ արձակումը: Նա  կրկին արտահայտել է իր դժգոհությունը Կատարում ՀԱՄԱՍ-ի առաջնորդների վրա Իսրայելի հարձակման վերաբերյալ, սակայն ասել է, որ միջադեպը չի վնասի երկու երկրների միջև հարաբերություններին, որոնք մնում են ամուր։

«Ինչ եղել է, եղել է: Մենք կհանդիպենք Իսրայելի ղեկավարության հետ, կխոսենք այն մասին, թե ինչ է սպասվում ապագայում», – ասել էր  Ռուբիոն ուղևորությունից առաջ։

Հիշեցենք, որ ավելի վաղ էլ ԱՄՆ նախագահ Դոնալդ Թրամփը հայտարարել էր, որ իսրայելական հարվածը Կատարին «չի նպաստում Իսրայելի կամ Ամերիկայի նպատակներին»։

Թարգմանությունը՝ Էմմա Չոբանյանի