Իշխանությունն ասաց՝ Արցախի էջը փակված է, ո՛չ, տղերք, որևէ մեկը չի կարող արցախցիների փոխարեն որոշել, էջը փակել. Տիգրան Աբրահամյան. ՏԵՍԱՆՅՈՒԹ

ՀՀ ԱԺ «Պատիվ ունեմ» խմբակցության քարտուղար Տիգրան Աբրահամյանը Factor TV-ի հետ հարցազրույցում քննադատել է Հայաստանի իշխանությունների և Ադրբեջանի միջև ընթացող բանակցությունները և դրանց արդյունքները։

Աբրահամյանի խոսքով՝ Նիկոլ Փաշինյանի և Իլհամ Ալիևի ստորագրած համաձայնագրում առանձնացված է «անջատողականության դեմ պայքարի» դրույթը, որի տակ ակնհայտորեն Արցախն է նկատի առնվում։ «Այդ փաստաթղթում որևէ կետ չի եղել Արցախի ժողովրդի իրավունքների մասին», – շեշտում է պատգամավորը։

Նա ընդգծում է, որ իշխանության պնդումը՝ թե Արցախի էջը փակված է, որևէ իրավական կամ բարոյական հիմք չունի։ «Ո՛չ, տղերք, որևէ մեկը չի կարող արցախցիների փոխարեն որոշել այդ էջը փակված համարել»,- հայտարարում է Աբրահամյանը։

Նրա խոսքով՝ Արցախից տեղահանվածների վերադարձի հարցը երկարատև և բարդ գործընթաց է։ «Երբ խոսում ենք արցախահայերի վերադարձի իրավունքից, չենք ասում, թե դա վաղվա կամ մեկ տարվա ընթացքում է լինելու։ Դա շատ ավելի խորքային գործընթաց է»,- պարզաբանում է պատգամավորը։

Միևնույն ժամանակ նա ընդգծում է, որ որևէ քաղաքական ուժ չի կարող խոստանալ արագ լուծում․ «Եթե հարցնեք՝ իշխանության գալով արցախցիների վերադարձը մեկ տարում կապահովե՞ք, չեմ կարծում, որ կա ուժ, որը կասի՝ այո՛, դա կանեմ»։

Աբրահամյանը նաև շեշտում է, որ խաղաղության համաձայնագրի ստորագրումը ներկայիս տեսքով ցանկալի չէ․ «Ես չէի ուզենա, որ Ադրբեջանը ստորագրի այս փաստաթուղթը, որովհետև ՀՀ-ի շահերը դրա մեջ արտացոլված չեն»։

Հարցազրույցն ամբողջությամբ՝ տեսանյութում։

Ռոբերտ Անանյան