05.09.2026 | 19:58
Քննարկվել են Հայաստանի և Իրաքյան Քուրդիստանի միջև տնտեսական կապերի զարգացման հնարավորությունները
Կիևին հասցված ՌԴ զանգվածային հարվածից զոհերի թիվը հասել է 14-ի․ վնասվել է ԵՄ առաքելության շենքը
Քաղաքականություն
28.08.2025 | 15:20
Ուկրաինայի արտաքին գործերի նախարար Անդրեյ Սիբիhան հայտնել է, որ Կիևին գիշերային հարվածի հետևանքով վնասվել է Եվրամիության առաքելության շենքը։ Նա նաև X-ի միկրոբլոգում հրապարակել է լուսանկարներ, որոնցում երևում են դիվանագիտական առաքելության սենյակներից մեկի վնասված պատուհաններն ու առաստաղը։
«Գիշերային հարվածի ժամանակ Ռուսաստանը թիրախավորել է նաև դիվանագետներին՝ Վիեննայի կոնվենցիայի ուղղակի խախտմամբ։ Ուկրաինայում ԵՄ առաքելությունը վնասվել է։ Սա պահանջում է ոչ միայն ԵՄ-ի, այլև համաշխարհային դատապարտում։ Մենք համերաշխություն ենք հայտնում մեր ԵՄ գործընկերներին և պատրաստ ենք օգնություն ցուցաբերել»,- գրել է Սիբիհան։
Նա նաև նշել է, որ անկախ նրանից, թե ինչ է ասել ՌԴ նախագահ Պուտինն Ալյասկայում, նրա իրական գործողությունները մերժում են դիվանագիտությունը, երկխոսությունը և խաղաղության ջանքերը։ Սիբիհան ընդգծել է՝ Պուտինը կանգ կառնի միայն ճնշման և ուժի ազդեցության տակ և կոչ է արել հանրային դատապարտման ու գործողությունների, նոր պատժամիջոցների կիրառման Ռուսաստանի դեմ և ավելի ուժեղ դիրքորոշում Ուկրաինայի համար։
Արձագանքելով կատարվածին՝ Եվրոպական խորհրդի նախագահ Անտոնիո Կոշտան հայտարարել է, որ սարսափած է Ուկրաինայի վրա Ռուսաստանի մահացու հրթիռային հարվածներից։
«Իմ մտքերն ուկրաինացի զոհերի, նաև ԵՄ պատվիրակության աշխատակիցների հետ են, որոնց շենքը վնասվել է այս միտումնավոր ռուսական հարվածի հետևանքով։ ԵՄ-ին չես վախեցնի։ Ռուսաստանի ագրեսիան միայն ամրապնդում է մեր վճռականությունը՝ կանգնելու Ուկրաինայի և նրա ժողովրդի կողքին»,- գրել է Կոշտան X-ի միկրոբլոգում։
Կիևի վրա հարվածի հետևանքով զոհերի թիվը հասել է 14-ի։
«Ցավոք, նրանց թվում կա երեք երեխա՝ 2, 14 և 17 տարեկան»,- գրել է Կիևի մարզային վարչակազմի ղեկավար Տիմուր Տկաչենկոն։
Բացի այդ, վնասվել է Կիևում գտնվող Բրիտանական խորհրդի (The British Council) գրասենյակը։ Կազմակերպությունը ստեղծվել է 1934 թվականին՝ Մեծ Բրիտանիայի և այլ երկրների միջև կրթության, մշակույթի և արվեստի ոլորտում համագործակցությունը զարգացնելու նպատակով և հայտարարվել է «անցանկալի» Ռուսաստանի Դաշնությունում։
«Կիևի վրա գիշերային հարձակման հետևանքով մեր գրասենյակը զգալի վնաս է կրել և մինչև հետագա ծանուցում փակ կմնա այցելուների համար»,- նշված է կազմակերպության ֆեյսբուքյան էջում։
Թարգմանությունը՝ Էմմա Չոբանյանի
