Դատարանը քննում է Սամվել Կարապետյանի կալանքը երկարաձգելու միջնորդությունը․ ՈՒՂԻՂ

Հակակոռուպցիոն դատարանում դատավոր Տիգրան Դավթյանի նախագահությամբ քննվում է ռուսաստանաբնակ գործարար, «Տաշիր ընկերությունների» խմբի սեփականատեր Սամվել Կարապետյանի կալանքը երկու ամսով երկարաձգելու միջնորդությունը։

Սամվել Կարապետյանը կալանավորվել է հունիսի 18-ին, երկամսյա ժամկետով: Նա մեղադրվում է իշխանությունը զավթելու, սահմանադրական կարգը բռնի տապալելու հրապարակային կոչ անելու համար։ Կարապետյանը մեղադրանքը չի ընդունում, նրա պաշտպանական խումբը պնդում է, որ առաջադրված մեղադրանքը անհիմն է:

Նշենք, որ վերաքննիչ քրեական դատարանը ոչ իրավաչափ է ճանաչել Սամվել Կարապետյանի ձերբակալումը։

Հիշեցնենք, որ Կարապետյանը News.am-ի հետ զրույցում անդրադարձել էր վարչապետ Նիկոլ Փաշինյանի և եկեղեցու հարաբերություններին՝ ասելով․ «Ինչ կարծիք ես պետք է ունենամ, եթե մի փոքրիկ խմբակ, մոռանալով Հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու, հայ ժողովրդի վրա»։ «Քանի որ ես միշտ եղել եմ հայ ժողովրդի ու հայ եկեղեցու կողքին, ունենալու եմ անմիջական մասնակցություն. եթե չհաջողվի քաղաքական գործիչներին, ուրեմն մենք էլ մեր ձևով ենք մասնակցելու այդ ամեն ինչին»,- հարցազրույցի ժամանակ նշել էր գործարարը։ Ուշագրավ է, որ սկզբում լրատվամիջոցը նշել էր, թե Կարապետյանն ասել էր. «Եթե քաղաքական գործիչներին չհաջողվի, ապա մենք մեր ձևով ենք միջամտելու եկեղեցու դեմ արշավին»։ Սակայն, 01:12 րոպե տևողությամբ հարցազրույցի մեջ բացակայում էր «միջամտել» բառը։

Այս հայտարարությունից հետո իրավապահները նրա տանը խուզարկություններ էին  իրականացրել, որից հետո ձերբակալվել և կալանավորվել էր Կարապետյանը։ Ըստ ՔԿ-ի՝ ՀՀ քրեական օրենսգրքի 422-րդ հոդվածի 2-րդ մասով նախաձեռնվել է քրեական վարույթ այն կապակցությամբ, որ Սամվել Կարապետյանը զանգվածային լրատվության միջոցով հարցազրույց տալու ընթացքում հնչեցրել է իշխանությունը զավթելուն՝ ՀՀ սահմանադրությամբ չնախատեսված եղանակով ՀՀ կառավարության լիազորություններին տիրանալուն ուղղված հրապարակային կոչ:

Մանրամասները՝ տեսանյութում։