Վենսը հայտարարել է ԱՄՆ-ի կողմից Ուկրաինային զենքի մատակարարման ֆինանսավորումը դադարեցնելու մտադրության մասին

Վաշինգտոնը պատրաստվում է դադարեցնել Ուկրաինային զենքի մատակարարման ֆինանսավորումը, Fox News-ին տված հարցազրույցում հայտարարել է ԱՄՆ փոխնախագահ Ջեյ Դի Վենսը, փոխանցում է Moscow Times-ը։

«Եթե եվրոպացիները ցանկանում են նախաձեռնություն ցուցաբերել և զենք գնել ամերիկյան արտադրողներից, համաձայն ենք, բայց մենք այլևս չենք ֆինանսավորելու դա»,- ասել է նա։

ԱՄՆ նախագահի վարչակազմը զգուշացրել է եվրոպացի դաշնակիցներին, որ նրանք պետք է պատրաստ լինեն «ավելի էական դեր ստանձնել» հակամարտության ֆինանսավորման գործում, քանի որ այն տեղի է ունենում «իրենց հետնաբակում», հավելել է Վենսը։

Պաշտոնյան ընդգծել է՝ ԱՄՆ-ը ձգտում է դադարեցնել ռուս-ուկրաինական պատերազմը՝ հաշվի առնելով շփման ներկայիս գիծը, և որ Դոնալդ Թրամփի ու Ռուսաստանի նախագահ Վլադիմիր Պուտինի՝ օգոստոսի 15-ին Ալյասկայում նախատեսված հանդիպումը «մեծ առաջընթաց է ամերիկյան դիվանագիտության համար»։ Վենսը նշել է, որ ԱՄՆ-ը բանակցությունների ընթացքում կփորձի գտնել փոխադարձաբար ընդունելի լուծում և՛ Մոսկվայի, և՛ Կիևի համար, բայց «երկու կողմերն էլ, հավանաբար, դժգոհ կլինեն դրանից»։

Միևնույն ժամանակ, եվրոպացի առաջնորդները Թրամփին կոչ են արել ուժեղացնել Պուտինի վրա ճնշումը, քանի որ, ըստ Գերմանիայի կանցլեր Ֆրիդրիխ Մերցի, նա «գործում է միայն ճնշման տակ»։

«Ակնհայտ է, որ [Ռուսաստանի վրա] ռազմական ճնշումը բավականաչափ ուժեղ չէ, և ԱՄՆ պատժամիջոցները դեռևս չեն կիրառվել։ Եթե դրանք կիրառվեին, Ռուսաստանի տնտեսության վրա ազդեցությունը զգալի կլիներ։ Ես կոչ արեցի ԱՄՆ նախագահին անել դա»,- ARD հեռուստաալիքի եթերում ասել է Մերցը։