29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Իսրայելական պատվիրակությունը մեկնում է Ադրբեջան․ Սիրիայի հարցով բանակցություններ կանցկացվեն Բաքվում․ ԶԼՄ-ներ
Քաղաքականություն
23.07.2025 | 13:58
Սիրիայի հարցով միջազգային բանակցությունների հաջորդ փուլը տեղի կունենա Բաքվում։ Ադրբեջանական լրատվամիջոցների հաղորդմամբ՝ այս մասին հայտնել է սաուդյան Al-Hadath հեռուստաալիքը։
Աղբյուրների համաձայն՝ սիրիական կողմի հետ համաձայնագրերը վերջնականացնելու համար սպասվում է իսրայելական պատվիրակության այցը Ադրբեջան։ Կքննարկվի նաև Սուեյդայի շուրջ վեճը։
«Ալ Արաբիա»-ն էլ հաղորդել է, որ Իսրայելի և Սիրիայի միջև կապի ուղիները վերաբացվել են ԱՄՆ-ի միջնորդությամբ և Թուրքիայի աջակցությամբ: Հաղորդվում է, որ Թուրքիան և Սիրիան բանակցություններ են վարում քրդական, դրուզական և ալավիական փոքրամասնությունների կարգավիճակի, ինչպես նաև տարածաշրջանային փոխըմբռնման շուրջ, որը ներառում է Իսրայելի դերը:
Միևնույն ժամանակ, Իսրայելը պարտավորություն չի ստանձնել՝ դադարեցնել Սիրիայի վրա հարձակումները և պնդում է 1974 թվականին հաստատված հրադադարի գծի երկայնքով լայն ապառազմականացված անվտանգության գոտու ստեղծման հարցում՝ շուրջ 80 կիլոմետր երկարությամբ և կես կիլոմետրից մինչև 10 կիլոմետր խորությամբ։
Ավելի վաղ միջազգային լրատվամիջոցները հաղորդել էին, որ Իսրայելի և Սիրիայի ներկայացուցիչները հանդիպել են Ադրբեջանում հուլիսի 12-ին։ Ըստ տեղեկությունների՝ բանակցություններ են տեղի ունեցել Իսրայելի ազգային անվտանգության խորհրդական Ցախի Հանեգբիի և Սիրիայի արտաքին գործերի նախարար Ասաադ աշ-Շիբանիի միջև։
Հանդիպումն անցկացվել է Սիրիայի անցումային շրջանի նախագահ Ահմեդ ալ-Շարաայի՝ Բաքու կատարած այցի շրջանակում, ինչը նշանակալի իրադարձություն էր՝ հաշվի առնելով, որ Սիրիան և Իսրայելը վերջին երկու տասնամյակների ընթացքում թշնամական հարաբերությունների մեջ են եղել։
Թարգմանությունը՝ Էմմա Չոբանյանի
