Անպիտան ներքնակն օրերով նետված է մայթին․ ով է Երևանում պատասխանատու խոշոր աղբի մաքրման համար. ՏԵՍԱՆՅՈՒԹ

Մոսկովյան փողոցի սկզբնամասում անպիտան ներքնակը մայթին՝ աղբամանների մոտ,  գցված է առնվազն մի քանի օր։ Factor TV-ն արձանագրել է, որ դեռ հուլիսի 16-ին աղբամանների մոտ նետած ներքնակն այսօր էլ շարունակում է նույն տեղում մնալ։

Լոգարան, գրասեղան, կոտրված աթոռ, ստվարաթուղթ, խողովակ և այլ կենցաղային իրեր հաճախ կարելի է տեսնել Երևանի աղբամանների հարևանությամբ։ Ո՞վ է պատասխանատու դրանց հեռացման համար։ «Երևանի աղբահանություն և սանիտարական մաքրում» հիմնարկը զբաղվում է մայրաքաղաքի աղբամանների ու տարածքի սանիտարական մաքրմամբ։ Հիմնարկի ղեկավար Սաշա Կատվալյանի խոսքով՝ խոշորաչափ կամ շինաղբ համարվող իրերի հավաքումն իրականացնում է «Դավարս» ընկերությունը։

Մայրաքաղաքում տեղադրված են նաև աղբը տեսակավորելու համար նախատեսված գունավոր աղբամաններ։ Սակայն Factor TV-ն արձանագրել է, որ շատ դեպքերում դրանք էլ ճիշտ չեն օգտագործվում։ Օրինակ՝ ալյումինի համար նախատեսված աղբամանում ստվարաթուղթ և կտորե պայուսակ արձանագրեցինք, թղթի համար նախատեսվածում՝ թխվածքաբլիթ։ 

Քաղաքային իշխանությունն ասում է՝ «Դավարս» ընկերության աշխատանքից գոհ չեն։ Քաղաքապետարանի և ընկերության միջև գործող պայմանագիրն ավարտվում է հաջորդ տարի։ Առայժմ պարզ չէ՝ արդյո՞ք ընկերությունը կշարունակի զբաղվել խոշոր աղբի և շինաղբի մաքրմամբ, թե այդ գործառույթը կանցնի «Երևանի աղբահանություն և սանիտարական մաքրում» հիմնարկին։ Մեզ չհաջողվեց կապ հաստատել «Դավարս» ընկերության հետ։ 

Ի դեպ, այս տարվանից Երևանում թանկացել է նաև աղբահանության վճարը։ Եթե նախկինում բնակիչներն ամսական վճարում էին 200 դրամ՝ մեկ շնչի հաշվով, ապա այժմ վճարը սահմանվում է ըստ բնակարանի մակերեսի՝ յուրաքանչյուր քմ-ի դիմաց 13 դրամ։ Սակայն, ինչպես պնդում է «Երևանի աղբահանություն և սանիտարական մաքրում» հիմնարկի ղեկավար Սաշա Կատվալյանը, անգամ նոր կարգով հավաքագրված գումարը չի բավականացնում ծախսերին։ Այդ դեպքում բաց է մնում հարցը՝ ինչպե՞ս է հիմնարկը պատրաստվում ստանձնել նաև շինաղբի և խոշոր աղբի մաքրման բեռը։

Մանրամասները՝ տեսանյութում։

Անի Թամրազյան