29.04.2026 | 13:19
Արման Ծառուկյանը հայտնել է՝ ինչու չի մասնակցելու Սպիտակ տան մրցաշարին
ԵՄ-ն բարձր է գնահատում Հարավային Կովկասում կայունության ապահովման ՀՀ-ի ջանքերը՝ Ադրբեջանի հետ բանակցություններն ու Թուրքիայի հետ կարգավորման քայլերը․ Կոշտա
Քաղաքականություն
14.07.2025 | 15:15
Կարևոր հանդիպում ՀՀ վարչապետ Նիկոլ Փաշինյանի ու Եվրահանձնաժողովի նախագահ Ուրսուլա ֆոն դեր Լեյենի հետ՝ ԵՄ-ի և Հայաստանի միջև զարգացող գործընկերությունը վերահաստատելու համար։ Այս մասին X-ում գրել է Եվրոպական խորհրդի նախագահ Անտոնիո Կոշտան ՀՀ վարչապետ Նիկոլ Փաշինյանի հետ եռակողմ հանդիպման արդյունքների վերաբերյալ։
«ԵՄ-ն վճռականորեն աջակցում է Հայաստանի հավակնոտ բարեփոխումների օրակարգին: Մենք բարձր ենք գնահատում Հայաստանի ջանքերը Հարավային Կովկասում կայունություն ապահովելու համար, մասնավորապես, Ադրբեջանի հետ խաղաղության բանակցություններում շարունակական ներգրավվածությունը և Թուրքիայի հետ հարաբերությունների կարգավորմանն ուղղված քայլերը»,- նշել է Կոշտան։
Ըստ նրա՝ վերջերս համաձայնեցված ԵՄ-ՀՀ գործընկերության օրակարգը նոր գլուխ է բացում հարաբերություններում՝ խթանելով տարածաշրջանային և տնտեսական ավելի սերտ կապերը։
«Մենք անհամբեր սպասում ենք, որ Հայաստանը հյուրընկալի Եվրոպական քաղաքական համայնքի գագաթնաժողովը 2026 թվականին»,- հավելել է Կոշտան։
Ուրսուլա ֆոն դեր Լեյենը եռակողմ հանդիպման վերաբերյալ ևս գրառում է արել X-ի իր միկրոբլոգում։
«Հաճելի է Ձեզ կրկին Բրյուսելում տեսնել։ Դուք ցույց տվեցիք Հայաստանի խորը նվիրվածությունը խաղաղությանը և կայունությանը։ Քանի որ մեր կապերը սերտանում են ավելի, քան երբևէ, ԵՄ-ի Դիմակայունության և աճի ծրագիրը ռազմավարական ներդրում է Հայաստանի ապագայի մեջ»,- հայտարարել է Եվրահանձնաժողովի նախագահը։
Թարգմանությունը՝ Էմմա Չոբանյանի
