Թուրքիայի ազգայնական կուսակցությունն առաջարկում է ՀՀ-ի հետ սահմանային անցակետը Թալեաթ փաշայի անունով կոչել

Թուրքիայի ընդդիմադիր ազգայնական İYİ (Լավ) կուսակցությունն օրինագիծ է ներկայացրել խորհրդարան՝ առաջարկելով Թուրքիայի և Հայաստանի սահմանին գտնվող «Ալիջան» սահմանային անցակետը վերանվանել Թալեաթ փաշայի անունով, հաղորդում է թուրքական NTV-ն։

Հիշեցնենք՝ Թալեաթ փաշան Հայոց ցեղասպանության գլխավոր կազմակերպիչներից է։

Օրինագիծը Թուրքիայի Ազգային մեծ ժողովի նախագահություն է ներկայացվել İYİ կուսակցության նախագահ Մուսավաթ Դերվիշօղլուի և 28 պատգամավորի ստորագրություններով։

Դրանում, մասնավորապես, ասվում է․ «Մեր կարևոր սահմանային անցակետերից մեկի՝ «Ալիջան» սահմանային դարպասի վերանվանումը «Թալեաթ փաշայի սահմանային դարպաս», կլինի մեր պատմությունը, անկախության համար մեր պայքարը և մեր ազգային հիշողությունը պաշտպանելու կամքի կոնկրետ դրսևորում։ Թալեաթ փաշան առաջատար դեմքերից մեկն է, ով թուրք ազգի ամենադժվարին պահերին կրել է պետության պատասխանատվությունը և կայսրության ավերակների տակից վերածնել ազգի գոյության գիտակցությունը։ Նա ծառայել է որպես մեծ վեզիր Օսմանյան կայսրության վերջին շրջանում և ոչ միայն քաղաքական առաջնորդ էր, այլև ազգի գոյության և գոյատևման պայքարի ճարտարապետներից մեկը»։

Նշվում է, թե «սահմանային անցակետը Թալեաթ փաշայի անունով կոչելը հարգանքի նշան է, որը կփորագրվի թուրքական աշխարհագրության մեջ․ այդ փոփոխությունը պարզապես ցուցանակի փոփոխություն չէ, դա թուրք ազգի կամքի հստակ հայտարարություն է՝ պաշտպանելու իր սեփական պատմությունը, իր սեփական հերոսներին և իր սեփական հիշողությունը»:

Թարգմանությունը՝ Էմմա Չոբանյանի