Դրա մասին վաղ է խոսել․ Ռուբինյանը՝ ադրբեջանցու արտահանձնման հնարավորության մասին․ ՏԵՍԱՆՅՈՒԹ

Ես անիմաստ եմ համարում ադրբեջանցի զինծառայողին արտահանձնելու հարցը հիմա քննարկելը, որովհետև նման քննարկում չկա այս պահին, այս պահին կա ձերբակալված անձ, ում առաջադրված է մեղադրանք, վերջ։ Այս մասին ճեպազրույցի ժամանակ նշեց ԱԺ նախագահ Ռուբեն Ռուբինյանը։

«Այս պահին ոչ մի այլ գործընթաց չկա և ընդդիմության այդ խոսույթները կրկին պայքար են ոչնչի դեմ, որովհետև չկա բան, որի դեմ իրենք իրականում պայքարում են, գոյություն չունի այդ թեման։ Ապագայում, երբ որ ժամանակ կգա, կքննարկենք, ես հիմա ճիշտ պահ չեմ համարում ձեր բարձրացրած հարցը քննարկելը։

Ինչ վերաբերում է անվտանգությանը, ես ուզում եմ կրկնել՝ մեր սահմանը Ադրբեջանի հետ երկար է, չսահմանազատված է և խրամատավորված է։ Սա անխուսափելիորեն բերել է նրան, որ միշտ բոլոր տարիներին եղել են դեպքեր, երբ երկու կողմերից զինվորները, որոնք մոլորվել են, կամ դասալիքներ են, որոնք հատուկ այս կամ այն պատճառով անցել են մյուս կողմ, անցել են այդ սահմանը։

Իրատեսական չի իրականում սահմանով վերահսկել մեկ անձի շարժը։ Խմբի, վաշտի շարժը հնարավոր է վերահսկել, բայց երբ մի հոգի սարերում մենակ շարժվում է, դա շատ դժվար է վերահսկել։ Բայց դա այդքան էլ վախենալու բան չի, որովհետև մի հոգին, բնականաբար, չի կարող նպատակաուղղված օպերացիա իրականացնել։ Մի հոգու դեպքում գերակշիռ մեծամասնությունում ոչ մի միջադեպ չի լինում, որովհետև գտնում են և տալիս են մյուս կողմին։ Հիմա այս դեպքում տեղի է ունեցել շատ ցավալի այդ միջադեպը։
Սա չի նշանակում, որ մենք սահմանային հավելյալ վախերի պատճառ ունենք, ոչ, մեր սահմանները հնարավորինս կայուն են, մենք ունենք մի իրավիճակ, երբ արդեն երկու տարի և 5-6 ամիս արդեն մեր սահմաններին չի եղել գեթ մեկ զոհ հակառակորդի կրակոցից։ Սա պետք է գնահատել, մենք ունենք արդեն մեր սահմանին սահմանազատված հատված, որը իրականում այս առումով ամենապահով մասն է։

Ո՞րն է մեր սահմանը էլ ավելի անվտանգ դարձնելու ճանապարհը: Դա լիակատար սահմանազատումն ու սահմանագծումն է, երբ մեր խրամատավորված սահմանը, որը պահում են զինվորները, ամբողջությամբ կվերափոխվի սահմանազատված սահմանի, որտեղ երկու կողմերն էլ սանտիմետրի ճշգրտությամբ գիտեն՝ որտեղ է ավարտվում Հայաստանը և սկսում Ադրբեջանը կամ հակառակը, և որը հսկում են սահմանապահները, որոնք շատ ավելի թեթև զինված են լինելու կամ կարող է պայմանավորվածություն լինի, ընդհանրապես զինված չլինեն»,– հայտարարեց Ռուբինյանը։

Մանրամասները՝ տեսանյութում։

Նարեկ Կիրակոսյան