«Պետության ղեկին նստած մարդը մեծ վնասներ է հասցնում մեզ, երբեմն՝ անդառնալի». Եղիշե Պետրոսյան

«Շատ վատ, անթույլատրելի եմ գնահատում իշխանությունների ու իրավապահների գործողությունները»,- Factor TV-ի հետ զրույցում ասաց երաժիշտ, երգահան, ԱԺԲ անդամ Եղիշե Պետրոսյանը՝ անդրադառնալով այսօր Մայր Աթոռի բակում տեղի ունեցած իրադարձություններին։

«Սրանք մեր եկեղեցու, արժեհամակարգի դեմ ուղղված քայլեր են, անկախ նրանից՝ դա գիտակցաբա՞ր է արվում, թե՞ հատուկ հանձնարարությամբ»,- նշեց Պետրոսյանը։

Իսկ ի՞նչ սպասել այսօրվա գործողություններից, ի՞նչ հետևանք կունենան դրանք, երաժիշտ Եղիշե Պետրոսյանն ընդգծում է.

«Մեր պետության ղեկին մարդ է նստած, որը չգիտի կամ հակառակը, լավ գիտի՝ ինչ է անում, համենայնդեպս ինչ էլ անում է՝ մեծ վնասներ է հասցնում մեզ, երբեմն՝ անդառնալի»։

Հիշեցնենք՝ երեկ հայտնել էինք, որ Շիրակի թեմի առաջնորդ Միքայել Աջապահյանի՝ լրատվամիջոցներին տված հարցազրույցի առթիվ քրեական վարույթ է նախաձեռնվել:

«Վարույթը նախաձեռնվել է Քրեական օրենսգրքի 422-րդ հոդվածի 2-րդ մասով է, այսինքն՝ իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերը»,- Factor TV-ի հետ զրույցում տեղեկացրել էին Գլխավոր դատախազությունից։

Շիրակի թեմի առաջնորդը հեղաշրջման մասին առաջին անգամ խոսել է 2024 թվականի փետրվարին՝ ասելով. «Ե՛վ ասել եմ՝ պետք է ռազմական հեղաշրջում, և՛ դրանից հետո էլ եմ ասել՝ պետք է ռազմական հեղաշրջում, բայց մենք բանակ չունեցանք, չունեցանք գեներալիտետ, ովքեր կանեին այդ անհրաժեշտ քայլը պետականության և Արցախի փրկության համար»: Ռազմական հեղաշրջման մասին նա խոսել էր նաև օրերս՝ News.am-ին տված հարցազրույցում։

Ռոզա Վարդանյան