11.12.2025 | 20:30
«Հարսնաքար»-ը, Գասպարյանի առանձնատունը, Միքայելյանի տնակը․ Սևանի ափի որ գույքերը կքանդի պետությունը
Արդյո՞ք ԱՄՆ-ն պատրաստ է դուրս գալ ՆԱՏՕ-ից. Թրամփը Մերցին հստակ պատասխան է տվել
Քաղաքականություն
07.06.2025 | 10:58
Գերմանիայի կանցլեր Ֆրիդրիխ Մերցը հայտարարել է, որ կասկածներ չունի Հյուսիսատլանտյան դաշինքին ԱՄՆ-ի նվիրվածության վերաբերյալ: Նա այս մասին ասել է Բեռլինում ԱՄՆ նախագահ Դոնալդ Թրամփի հետ հանդիպումից հետո «Ընտանեկան ձեռնարկատերերի ասոցիացիայի» միջոցառման ընթացքում ունեցած ելույթի ժամանակ․ հաղորդում է Politico-ն:
«Ես կասկածներ չունեմ ԱՄՆ կառավարության՝ ՆԱՏՕ-ին նվիրվածության վերաբերյալ», – ընդգծել է Մերցը:
Կանցլերի խոսքով՝ մասնավոր զրույցի ժամանակ նա ուղղակիորեն հարցրել է Թրամփին ԱՄՆ-ի՝ դաշինքից դուրս գալու հնարավորության մասին:
Մերցն ասել է. «Հարցը, որը տրվել է, այն էր, թե արդյոք նա ՆԱՏՕ-ից դուրս գալու որևէ ծրագիր ունի: Եվ պատասխանը հստակ «ոչ» էր: Այս հարցի վերաբերյալ այլ մեկնաբանություններ չեն եղել, նույնիսկ դրանից հետո ճաշի ժամանակ»:
Նշվում է, որ հանդիպման ընթացքում քննարկվել են նաև Ուկրաինայի պատերազմի, առևտրային քաղաքականության և ՆԱՏՕ-ի ապագայի հարցերը:
«Իհարկե, մենք մանրամասն քննարկել ենք մեզ անհանգստացնող երեք խոշոր հարցերը», – նշել է Մերցը: Նա ընդգծել է, որ Եվրոպան պետք է ավելի մեծ պատասխանատվություն ստանձնի անվտանգության ոլորտում:
Հիշեցնենք, որ Թրամփը բազմիցս քննադատել է ՆԱՏՕ-ի դաշնակիցներին պաշտպանական ոլորտի անբավարար ֆինանսավորման համար՝ առաջարկելով ծախսերը հասցնել ՀՆԱ-ի 5%-ին: Ակնկալվում է, որ սա կլինի հունիսի վերջին կայանալիք ՆԱՏՕ-ի գագաթնաժողովի թեմաներից մեկը:
Թարգմանությունը՝ Անահիտ Խաչատրյանի
