ԱՄՆ հետախուզության աշխատակից է ձերբակալվել, որը մեղադրվում է օտարերկրյա ներկայացուցչին գաղտնի տեղեկատվություն փոխանցելու փորձի համար

ԱՄՆ-ում ձերբակալվել է Պենտագոնի հետախուզական գործակալության տեղեկատվական տեխնոլոգիաների 28-ամյա մասնագետ՝ օտարերկրյա պետության ներկայացուցչին տեղեկատվություն փոխանցելու փորձ կատարելու կասկածանքով: Այս մասին հաղորդում է  Արդարադատության նախարարությունը, գրում է Current time-ը։

Գերատեսչության տվյալներով՝ Ալեքսանդրիայից Նաթան Վիլաս Լատչը միացել է ռազմական հետախուզության ծառայությանը 2019 թվականին և ստացել է գաղտնի փաստաթղթերին հասանելիություն։ 2025 թվականի մարտին ՀԴԲ-ն տեղեկություն է ստացել, որ Լատչն առաջարկել է գաղտնի տեղեկատվություն փոխանցել «բարեկամական օտարերկրյա պետության» ներկայացուցչին։ Էլեկտրոնային նամակում ուղարկողը գրել է, որ ինքը «համաձայն չէ այս վարչակազմի արժեքների հետ», հետևաբար, «պատրաստ է կիսվել գաղտնի տեղեկատվությամբ», որին հասանելիություն ունի, այդ թվում՝ ավարտված հետախուզական զեկույցները, չմշակված հետախուզական տվյալներ և այլ գաղտնի փաստաթղթեր։

Դրանից հետո նրա հետ սկսել է խոսել ՀԴԲ գաղտնի գործակալը, որին Լատչը համարել է «օտարերկրյա կառավարության ներկայացուցիչ»։ Երեք օրվա ընթացքում հետախուզության աշխատակիցը գաղտնի տեղեկություններն արտագրել է  աշխատավայրում գտնվող տետրում, ապա ջնջել դրանք։ Այնուհետև նա գործակալին տեղեկացրել է, որ պատրաստ է տվյալները փոխանցել։

Նշվում է, որ մայիսի 1-ին նա այգում գործակալի համար թողել է կրիչ և գաղտնի տվյալներով փաստաթղթեր, որից հետո հայտարարել է, որ ցանկանում է քաղաքացիություն ստանալ իր փոխանցած տեղեկատվության դիմաց։

Դրանից հետո հետախուզության գործակալը նրան տեղեկացրել է, որ պատրաստ է շարունակել տվյալներ ստանալ: Արդյունքում, Լատչը սկսել է հավաքել նոր գաղտնի տեղեկություններ և մայիսի 29-ին ժամանել է նախապես պայմանավորված վայր՝ փաստաթղթերը փոխանցելու համար, սակայն ձերբակալվել է ՀԴԲ գործակալների կողմից:

Թարգմանությունը՝ Էմմա Չոբանյանի