11.12.2025 | 20:42
Հայաստանը մնում է ՀԱՊԿ-ի լիիրավ անդամ. Զախարովա
Ուկրաինական աղբյուրները հայտնել են՝ Վլադիվոստոկում տեղի ունեցած պայթյունները Կիևի գործողությունն են
Քաղաքականություն
30.05.2025 | 18:22
Վլադիվոստոկի Դեսանտնայա ծովախորշում այսօր առավոտյան տեղի ունեցած երկու պայթյուններն Ուկրաինայի Պաշտպանության նախարարության գլխավոր հետախուզական վարչության գործողությունն են։ Այս մասին հայտնում են ՌԲԿ-Ուկրաինան և УНИАН-ը՝ հղում անելով աղբյուրներին, փոխանցում է BBC-ի ռուսական ծառայությունը։
Հաղորդվում է, որ պայթյունները տեղի են ունեցել 155-րդ առանձին գվարդիական ծովային հետևակի բրիգադի 47-րդ առանձին օդադեսանտային գրոհային գումարտակի տեղակայման տարածքում: Լրատվամիջոցների տվյալներով՝ հարձակման են ենթարկվել անցակետերը, ինչպես նաև զորամասի անձնակազմի և հրամանատարության գտնվելու վայրը։ Երկու լրատվամիջոցների պնդմամբ՝ պայթյունների հետևանքով մարդիկ են տուժել, իսկ ռազմական տեխնիկան և հատուկ սարքավորումները վնասվել են։
УНИАН-ը, հղում անելով տեղի բնակիչներին, նշում է, որ պայթյունների վայր են ժամանել մոտ տասը շտապօգնության մեքենաներ և տարհանման ուղղաթիռ։ Նրանց տեղեկությունների համաձայն՝ ռազմական տեխնիկան դուրս է բերվում զորամասի տարածքից։
Հիշեցնենք, որ Պրիմորիեի երկրամասի հակաահաբեկչական հանձնաժողովը հայտնել էր Դեսանտնայա ծոցախորշում երկու պայթյունի մասին։ Ռուսաստանի իշխանությունները պնդում են, որ զոհեր կամ վնասներ չեն եղել, պայթյունները տեղի են ունեցել գազի բալոնների բռնկման պատճառով։
Թարգմանությունը՝ Էմմա Չոբանյանի
