G7-ի երկրների ֆինանսների նախարարները ՌԴ-ին սպառնում են պատժամիջոցների խստացմամբ

Մեծ յոթնյակի (G7) երկրների ֆինանսների նախարարները համատեղ հայտարարություն են տարածել, որում սպառնում են ուժեղացնել Ռուսաստանի նկատմամբ ճնշումը, այդ թվում՝ խստացնելով պատժամիջոցները, եթե Մոսկվան չհամաձայնվի Ուկրաինայում հրադադարի ռեժիմի պահպանմանը։ Նրանք դատապարտել են Ռուսաստանի շարունակական ագրեսիան և հայտարարել, որ «ցանկացած կազմակերպություն, որը կաջակցի Ռուսաստանին հակամարտության ընթացքում», կբացառվի Ուկրաինայի վերականգնման պայմանագրերից, գրում է DW-ի ռուսական ծառայությունը:

G7 երկրների պաշտոոնյաները կարծիք են հայտնել, որ համաշխարհային տնտեսական քաղաքականության մեջ անորոշության գագաթնակետն արդեն անցել է։ Նրանք նշել են, որ համատեղ կաշխատեն շուկաները կայունացնելու և ընդհանուր քաղաքականության նպատակներ հետապնդելու համար։

Հայտարարության մեջ, առանց Չինաստանին ուղղակիորեն հիշատակելու, նշվում է, որ որոշ երկրների «ոչ շուկայական քաղաքականությունն ու գործելակերպն» ազդում են մյուսների տնտեսական անվտանգության վրա։ Փաստաթղթում կոչ է արվում ստեղծել «հավասար պայմաններ բոլորի համար»։

G7-ի ֆինանսների նախարարները համատեղ հայտարարություն են տարածել եռօրյա գագաթնաժողովից հետո, որը տեղի է ունեցել կանադական Բանֆ հանգստավայրում՝ Կալգարիի մոտ։ Կանադան ներկայում նախագահում է G7-ում, որի կազմում են նաև ԱՄՆ-ը, Գերմանիան, Մեծ Բրիտանիան, Ֆրանսիան, Իտալիան և Ճապոնիան։ Ռուսաստանը հեռացվել է նախկին G8-ից 2014 թվականին՝ Ղրիմի բռնակցումից հետո։

Հիշեցնենք, որ մայիսի 20-ին ԵՄ-ն հաստատել է Ռուսաստանի դեմ պատժամիջոցների 17-րդ փաթեթը, որը մշակվում էր մոտ մեկ ամիս։ Սահմանափակումների են ենթարկվել նաև «ստվերային նավատորմի» գրեթե 200 լցանավեր, որոնք Ռուսաստանն օգտագործում է G7-ի պատժամիջոցները շրջանցելով նավթ արտահանելու համար։ Պատժամիջոցներ են կիրառվել նաև 75 իրավաբանական և ֆիզիկական անձանց նկատմամբ, այդ թվում՝ «Սուրգուտնեֆտեգազ»-ի և մի քանի անօդաչու թռչող սարքեր արտադրողների։ Պատժամիջոցների ցանկում են նաև յոթ չինական ընկերություն, ևս երկուսը՝ ԱՄԷ-ից, մեկական՝ Թուրքիայից և Բելառուսից։

Bloomberg-ի տվյալներով՝ ԵՄ պատժամիջոցների հաջորդ՝ 18-րդ փաթեթը կուղղվի Ռուսաստանի ֆինանսական հատվածին։ Բացի այդ, քննարկվում են երրորդ երկրների բանկերի դեմ միջոցներ ձեռնարկելու հնարավորությունները։ Այլ հնարավոր քայլերից է ռուսական նավթի գնի շեմի իջեցումը՝ մեկ բարելի համար 60 դոլարից մինչև 30 դոլար, նաև «Հյուսիսային հոսքի» դեմ պատժամիջոցները։

ԱՄՆ երկու կուսակցություններից 81 սենատորներ էլ պատրաստակամություն են հայտնել աջակցել Ռուսաստանի և նրա դաշնակիցների նկատմամբ պատժամիջոցների ճնշումը մեծացնելուն ուղղված օրինագծին, եթե Կրեմլը հրաժարվի խաղաղություն հաստատել Ուկրաինայում։ Օրինագծով առաջարկվում է սահմանել 500 տոկոս մաքսատուրք այն երկրներից ներմուծվող ապրանքների վրա, որոնք գնում են ռուսական նավթ, գազ, ուրան և այլ ապրանքներ։

Թարգմանությունը՝ Էմմա Չոբանյանի