07.10.2026 | 12:56
Կոստանյանը ներկայացրել է ենթակառուցվածքների ապաշրջափակմամբ ստեղծվող տնտեսական հնարավորությունները
Արթուր Դանիելյանը ձերբակալվել է՝ դատարանի կալանքի ներկայացվելու համար
Հասարակություն
07.10.2026 | 12:05
«Ադեկվատ» միաբանության ղեկավար Արթուր Դանիելյանը ձերբակալվել է: Այս տեղեկությունը հայտնում է փաստաբան Տիգրան Աթանեսյանը։ Քննչական կոմիտեից հաստատում են ձերբակալման մասին տեղեկությունը։
«Անձի նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 2-րդ մասի 3-րդ կետով (խուլիգանությունը, որը կատարվել է տեղեկատվական կամ հաղորդակցական տեխնոլոգիաներն օգտագործելով)»,- հայտնում են Կոմիտեից։ Փաստաբան Տիգրան Աթանեսյանը մեզ հետ զրույցում հայտնեց, որ Դանիելյանին ձերբակալել են կալանքի համար դատարան ներկայացնելու նպատակով։
Նշենք, որ այսօր առավոտյան Արթուր Դանիելյանը հայտնել էր, որ իրեն կանչել են Քննչական կոմիտե՝ իր համար անհայտ գործի շրջանակներում։
«Ինձ էսօր առավոտյան կանչել են քննչական։ Գործ են հարուցել։ Մեղադրանք են առաջադրելու։ Չգիտեմ՝ ինչի մասին ա, էական էլ չի։ Եթե քննիչի մոտից դուրս գամ, ուղիղ եթերով կմեկնաբանեմ այս ամենը։ Բայց կոմբինացիան իրականում շատ պրիմիտիվ ա։ Ադրբեջանցիք էս 3 օր ա ընկել են կոնկրետ իմ հետևից։ Իմ հին ելույթները դրել, թարգմանել, տարածել են։ Երեք օր շարունակ մեկնաբանություններում ու անձնական մեսիջներով սպառնում են ինձ պատժել… էս գործն էլ դե պատիժն ա։ Սրանք էլ Բաքվից հանձնարարականը ստացել ու կատարում են», – գրել է Դանիելյանը՝ նշելով, որ իրեն ձերբակալել են՝ մյուսներին վախեցնելու համար և հորդորելով չվախենալ։
Արաքս Մամուլյան
