Ադրբեջանում UNICEF-ի ներկայացուցչությունն առաջիկայում կդադարեցնի գործունեությունը

ՄԱԿ-ի Մանկական հիմնադրամի ներկայացուցչությունն (UNICEF) առաջիկա ամիսներին կդադարեցնի Ադրբեջանում գործունեությունը։ Այս մասին ադրբեջանական լրատվամիջոցներին հայտնել է UNICEF-ի մամուլի ծառայության Եվրոպայի և Կենտրոնական Ասիայի տարածաշրջանային ղեկավար Իրինա Մազուրը։

Նրա խոսքով՝ գործընթացը տեղի կունենա փուլերով՝ մի քանի ամսվա ընթացքում։

«UNICEF-ը կշարունակի համագործակցել Ադրբեջանում գործընկերների հետ իր տարածաշրջանային և գլխավոր գրասենյակների միջոցով։ Վերջին 30 տարիների ընթացքում մեր համագործակցությունը նպաստել է մանկական մահացության նվազեցմանը, որակյալ կրթության հասանելիության ընդլայնմանը և երեխաների պաշտպանության համակարգերի ամրապնդմանը»,- ընդգծել է Մազուրը։

Հավելենք, որ վերջին շրջանում ՄԱԿ-ի մի շարք կառույցներ հայտարարել են Ադրբեջանում գործունեության դադարեցման մասին։ Դրանց թվում են ՄԱԿ-ի Զարգացման ծրագիրը, ՄԱԿ-ի բնակչության հիմնադրամը, ՄԱԿ-ի փախստականների հարցերով գերագույն հանձնակատարի գրասենյակը։

Հիշեցնենք, որ մարտին ադրբեջանական իշխանամերձ լրատվամիջոցները տեղեկություններ էին տարածել, որ Ադրբեջանի իշխանությունները ցանկանում են երկրում դադարեցնել ՄԱԿ-ի զարգացման ծրագրի (ՄԱԶԾ), ՄԱԿ-ի Փախստականների հարցերով գործակալության (ՄԱԿՓՀԳ) և Կարմիր Խաչի միջազգային կոմիտեի (ԿԽՄԿ) գործունեությունը։ Ավելի ուշ ՄԱԿ-ի կառույցների հետ աշխատանքի վերանայման մասին Ադրբեջանի ԱԳ նախարար Ջեյհուն Բայրամովը հայտնել էր ՄԱԿ-ի Զարգացման համակարգման գրասենյակի Եվրոպայի և Կենտրոնական Ասիայի տարածաշրջանային տնօրեն Կվի-Յոպ Սոնի հետ Բաքվում  հանդիպման ժամանակ։

Թարգմանությունը՝ Էմմա Չոբանյանի