Ադրբեջանցի զինվորականների մասնակցությունը Մոսկվայի Հաղթանակի շքերթին ՌԴ-ում Ադրբեջանի դեսպանը գնահատել է որպես հարգանքի տուրք

ՌԴ-ում Ադրբեջանի արտակարգ և լիազոր դեսպան Ռահման Մուստաֆաևը հանդիպել է Ադրբեջանի Զինված ուժերի զինծառայողների հետ, որոնք Մոսկվա են ժամանել՝ մասնակցելու մայիսի 9-ի Հաղթանակի շքերթին։ Դիվանագիտական առաքելության ղեկավարն ադրբեջանցի զինվորականների մասնակցությունը շքերթին գնահատել է որպես հարգանքի տուրք՝ Երկրորդ համաշխարհային պատերազմում զոհված ադրբեջանցի զինվորների հիշատակի, հայտնում է News.ru-ն։

Դեսպանը հավելել է, որ Ադրբեջանն իր հավասարակշռված արտաքին քաղաքականության շնորհիվ կարևոր ներդրում է ունենում տարածաշրջանային կայունության ապահովման գործում։

«Մենք համագործակցում ենք մեր բոլոր հարևանների, այդ թվում՝ Ռուսաստանի Դաշնության հետ, բարեկամության և ռազմավարական գործընկերության սկզբունքներով։ Ռուսաստանը դաշնակից պետություն է Ադրբեջանի համար, և այսօր, փոփոխվող աշխարհի ժամանակաշրջանում, նման հարաբերությունների կարևորությունն է՛լ ավելի է աճում»,- նշել է նա։

Հիշեցնենք, որ ավելի վաղ ՌԴ նախագահ Վլադիմիր Պուտինը հրավիրել էր Ադրբեջանի նախագահ Իլհամ Ալիևին՝ մասնակցելու Երկրորդ համաշխարհային պատերազմում հաղթանակի 80-ամյակի տոնակատարությանը։ Հրավերը հանձնել է Մոսկվայի և Համայն Ռուսիո պատրիարք Կիրիլը, որը պաշտոնական այցով Բաքու էր մեկնել։

Նշենք, որ մայիսի 3-ին Մոսկվայում կայացել է Հաղթանակի շքերթի գլխավոր փորձը։ Այդ կապակցությամբ քաղաքի մի շարք շրջաններում ժամանակավորապես սահմանափակվել էր տրանսպորտի երթևեկությունը։ Սա արդեն երրորդ նախապատրաստական միջոցառումն է առաջիկա տոնական շքերթից առաջ:

Տարբեր աղբյուրներ հայտնել են, որ մայիսի 9-ին Մոսկվայի Կարմիր հրապարակում կայանալիք Հաղթանակի շքերթին Ռուսաստանը հրավիրել է 19 երկրների, որոնցից 10-ը հաստատել են իրենց մասնակցությունը։ ՌԴ պաշտպանության նախարար Անդրեյ Բելոուսովը նշել է, որ հրավիրված երկրների թվում են ԽՍՀՄ 7 նախկին հանրապետություններ։ Մասնակցությունը հաստատած երկրների թվում են՝ Բելառուսը, Սերբիան, Սլովակիան, Իսրայելը, Ինդոնեզիան, Վենեսուելան, Պաղեստինը, Չինաստանը, Հյուսիսային Կորեան, Մյանման։