10.12.2025 | 21:28
Կրոնական ազատությունը Հայաստանում ժողովրդավարության կարևոր բաղադրիչներից է։
Քննարկվել են Հայաստանի ու Վրաստանի բանտային առողջապահության խնդիրները
Հասարակություն
14.07.2017 | 20:48
Հուլիսի 14-ին տեղի է ունեցել «Առողջապահությունը քրեակատարողական համակարգում. Հայաստանի և Վրաստանի փորձը» թեմայով կլոր սեղան-քննարկում: Քննարկմանը մասնակցել են ՀՀ մարդու իրավունքների պաշտպանի աշխատակազմի, ՀՀ արդարադատության նախարարության, ՀՀ ԱՆ քրեակատարողական վարչության և քաղաքացիական հասարակության ներկայացուցիչներ:
Հանդիպումը կազմակերպվել է երկու երկրներում բանտային առողջապահության խնդիրները և դրանց հնարավոր լուծումները համեմատության մեջ դիտարկելու և լավագույն փորձը փոխանակելու նպատակով:
Բացման խոսքում ՀՀ մարդու իրավունքների պաշտպանի աշխատակազմի քաղաքացիական, սոցիալ-տնտեսական և մշակութային իրավունքների պաշտպանության դեպարտամենտի ղեկավար Արմեն Մաշինյանը խոսել է ժողովրդավար հասարակությունում առողջության պահպանման, բժշկական օգնություն ստանալու յուրաքանչյուր անձի հիմնարար իրավունքի մասին:
Արմեն Մաշինյանը նշել է, որ Քրեակատարողական հիմնարկներում ազատությունից զրկված անձանց առողջության պահպանման խնդիրները քրեակատարողական համակարգում առավել տարածված, համակարգային և առաջնահերթ լուծում պահանջող մարտահրավերներ են: Այդ խնդիրներն ու դրանց լուծուման ուղիները վեր են հանվել ՀՀ մարդու իրավունքների պաշտպանի՝որպես կանխարգելման ազգային մեխանիզմի արտահերթ հրապարակային զեկույցում:
Պաշտպանի խորհրդական Նինա Փիրումյանը հանդիպման մասնակիցներին ներկայացրել է արտահերթ զեկույցի առանցքային ուղղությունները, դրանում բարձրացված հիմնահարցերը, ինչպես նաև իրավական ուսումնասիրությունների արդյունքները, որոնք կարող են կարևոր ուղենշային նշանակություն ունենալ ազատազրկված անձի առողջության պահպանման իրավունքի երաշխավորման և օրենսդրական անկատարությունների վերացման հարցում:
ՀՀ արդարադատության նախարարի տեղակալ Սուրեն Քրմոյանը քննարկման ընթացքում անդրադարձել է Արդարադատության նախարարության ձեռնարկած քայլերին. նախատեսվում է մինչև տարեվերջ քրեակատարողական բոլոր հիմնարկներում ամբողջությամբ արդիականացնել առողջության առաջնային պահպանման ծառայությունները:
«Առողջապահությունը քրեակատարողական համակարգում. Հայաստանի և Վրաստանի փորձը» քննարկման մասնակիցներին ներկայացվել է քրեակատարողական հիմնարկներում առողջապահական բարեփոխումների հայկական և վրացական փորձը:
Կլոր սեղանի մասնակից, «Միջազգային բանտային բարեփոխումներ» կազմակերպության վրացական մասնաճյուղի ներկայացուցիչ Բակար Ջիկիան գոհունակություն է հայտնել համագործակցության համար՝ հուսով, որ այն կլինի շարունակական:
