Գևորգ Փարսյանը երրորդ անգամ կպայքարի Կապանի համայնքապետի պաշտոնի համար

Ես՝ Գևորգ Ռազմիկի Փարսյանս, որոշում եմ կայացրել մասնակցել Կապան համայնքի ավագանու՝ նոյեմբերի 29-ին կայանալիք ընտրություններին, հայտնել է համայնքի գործող ղեկավարը։

«Հավատարիմ մնալով մեր սկզբունքներին և արժեքներին՝ Տեղական ինքնակառավարման մարմինների (ՏԻՄ) համամասնական ընտրակարգով անցկացվող ընտրություններին գլխավորելու եմ «Շանթ դաշինք» ազգայնական կուսակցության ընտրական ցուցակը:

Այս առաջադրումն ինքնանպատակ քայլ չէ, այլ արդեն իրականացված ծրագրերի շարունակականությունն ապահովելու, սկսածը ավարտին հասցնելու և զարգացման ներկա ընթացքը չընդհատելու անհրաժեշտությունից բխող որոշում։

Այս բարդ, բայց և արդյունավետ տարիների փորձի ու գիտելիքների շնորհիվ է, որ հստակ պատկերացնում եմ Կապան համայնքի առաջնահերթ խնդիրների լուծման ուղիները, զարգացման հնարավորություններն ու հեռանկարները, ունեմ ապագայի իրատեսական տեսլական, և գիտեմ, թե որ ուղղությամբ և ինչ քայլերով պետք է առաջ շարժվենք։

Հայրենակիցներիս վստահությունն ինձ համար մեծ պատասխանատվություն է, որը ստանձնել եմ գիտակցաբար և, ինչպես միշտ, պատրաստ եմ արդարացնել ամենօրյա հետևողական աշխատանքով, տեսանելի գործով և շոշափելի արդյունքներով։

Մենք ունենք կամք, բավարար ուժ և մեծ ցանկություն՝ է՛լ ավելին անելու մեր բնակիչների և Կապան համայնքի համար»,-նշել է նա։

Հիշեցնենք՝ Գևորգ Փարսյանն առաջին անգամ Կապանի համայնքապետի պաշտոնի համար առաջադրվել է 2018 թ. հոկտեմբերի 21-ի արտահերթ ՏԻՄ ընտրություններին որպես անկուսակցական թեկնածու։ Նրա հիմնական մրցակիցը ՔՊ-ի ներկայացուցիչ Նարեկ Բաբայանն էր։

Ըստ ընտրությունների արդյունքների՝ Փարսյանը ստացել էր մոտ 54.4% և ընտրվել համայնքի ղեկավար։ ՔՊ թեկնածուն պարտվել էր։ 2021-ի նոյեմբերի 14-ի ընտրություններին արդեն կիրառվում էր համամասնական ընտրակարգ։ Փարսյանը գլխավորում էր «Շանթ դաշինք» ազգայնական կուսակցության ցուցակը և հաղթեց նաև այդ ընտրություններում։