Ե՛վ Թրամփը, և՛ Զելենսկին «բլեֆ» են անում․ ինչու ԱՄՆ նախագահը չի կարող լքել Ուկրաինային․ Իվան Պրեոբրաժենսկի․ ՏԵՍԱՆՅՈՒԹ

«Դոնալդ Թրամփի շնորհիվ Ռուսաստանը հույս ունի այս ձմռանը վերջապես սառեցնել Ուկրաինան, ոչնչացնել նրա էներգետիկան և դատարկել Ուկրաինայի բոլոր խոշոր քաղաքները»,- Factor TV-ի հետ զրույցում այս մասին ասել է քաղաքագետ Իվան Պրեոբրաժենսկին։

Նրա կարծիքով՝ Կրեմլը հույս ունի օգտվել Ուկրաինայի նկատմամբ ամերիկյան աջակցության թուլացումից, հրահրել զանգվածային արտագաղթի նոր ալիք և, հումանիտար ճգնաժամի պայմաններում, հնարավոր է՝ սկսել ևս մեկ զանգվածային զորահավաք։

Մեկնաբանելով Վաշինգտոնի և Կիևի վատթարացող հարաբերությունները՝ Պրեոբրաժենսկին նշել է, որ և՛ Դոնալդ Թրամփը, և՛ Վլադիմիր Զելենսկին ներկայում «բլեֆ» են անում: Ուկրաինան երկար չի կարողանա զսպել ռուսական ագրեսիան առանց ամերիկյան ռազմական օգնության, բայց Կիևից աջակցության լիակատար դադարեցումը կարող է նաև քաղաքական ինքնասպանություն լինել Թրամփի համար: Քաղաքագետի խոսքով՝ ԱՄՆ նախագահի ներկայիս գործողությունները մեծապես թելադրված են նոյեմբերի 3-ին կայանալիք Կոնգրեսի ընտրություններով, որոնցից առաջ նա պետք է ցուցադրի արտաքին քաղաքականության հաջողություններ: Պրեոբրաժենսկին սա, ի թիվս այլ բաների, բացատրում է Թրամփի և Պուտինի մերձեցմամբ և վերջինիս՝ ԱՄՆ-ի և Իրանի միջև կրկին միջնորդելու փորձերով։

Միաժամանակ, փորձագետի խոսքով, Եվրոպան դեռևս ի վիճակի չէ լիովին փոխարինել Ուկրաինային տրամադրվող ամերիկյան ռազմական և տեխնոլոգիական աջակցությունը: Հատկապես վտանգավոր է Patriot համակարգերի համար հրթիռների պակասը, որոնք անհրաժեշտ են ուկրաինական քաղաքները ռուսական բալիստիկ հրթիռներից պաշտպանելու համար, ինչպես նաև ամերիկյան տեխնոլոգիաներին, այդ թվում՝ Starlink-ին, հասանելիության հնարավոր կորուստը։

Խոսելով Մոսկվայի երկարաժամկետ ռազմավարության մասին՝ Պրեոբրաժենսկին ընդգծել է, որ Ուկրաինայի նկատմամբ հաղթանակը դարձել է Պուտինի վերջնական նպատակը, որի համար նա պատրաստ է զոհաբերել գրեթե ամեն ինչ: Ավելին, ռուսական տնտեսության ռազմականացումը հասել է այնպիսի մակարդակի, որ, նրա գնահատմամբ, Կրեմլն այլևս բավարար ռեսուրսներ չունի պատերազմից դուրս գալու համար՝ առանց վճռական հաղթանակի:

Ավելին, Ուկրաինայի կողմից Դոնբասի ամրացված շրջանի հնարավոր զիջումը չի երաշխավորում ռազմական գործողությունների դադարեցում. Ռուսաստանը կարող է օգտագործել ժամանակավոր հրադադարը՝ իր ուժերը վերախմբավորելու և նոր հարձակում նախապատրաստելու համար։

Քաղաքագետը նաև անդրադարձել է Ռուսաստանի ագրեսիայի հետևանքներին Հարավային Կովկասի համար։ Նրա կարծիքով՝ Մոսկվան փաստացի զոհաբերել է տարածաշրջանում իր ազդեցության զգալի մասը՝ հանուն Ուկրաինայի դեմ պատերազմի՝ զիջելով տարածքներ Թուրքիային և Ադրբեջանին։ Նրա՝ Հայաստանի վրա ճնշում գործադրելու կարողությունը նույնպես զգալիորեն նվազել է. Ռուսաստանը պահպանում է տնտեսական և ռազմական լծակները, բայց Ուկրաինայի վրա կենտրոնացումը թույլ է տալիս Երևանին գործել զգալիորեն ավելի ինքնուրույն։

Պրեոբրաժենսկին նաև զգուշացրել է, որ Ուկրաինայի նկատմամբ հաղթանակի դեպքում Կրեմլը կարող է շարժվել դեպի հետագա ընդլայնում։ Սակայն դրան հասնելու համար Մոսկվան նախ պետք է թուլացնի ՆԱՏՕ-ի միասնությունը, այդ թվում՝ հիբրիդային պատերազմի միջոցով, որպեսզի դաշինքի երկրներն այլևս պատրաստ չլինեն պաշտպանել միմյանց։

Հարցազրույցն ամբողջությամբ՝ տեսանյութում։

Սամվել Մելիքսեթյան