09.10.2026 | 18:01
Կասպից ծովի ծանծաղումը կհանգեցնի աղետալի հետևանքների, մակերեսը կրճատվել է ավելի քան 20 հազար քառակուսի կմ-ով․ Ալիև
Պուտինի ներկայացուցիչն այս շաբաթ կայցելի Վաշինգտոն՝ հանդիպելու Թրամփի հատուկ բանագնացին․ CNN
Քաղաքականություն
02.04.2025 | 11:34
Ռուսաստանի ուղղակի ներդրումների հիմնադրամի ղեկավար, օտարերկրյա երկրների հետ ներդրումների և տնտեսական համագործակցության հարցերով ՌԴ նախագահ Վլադիմիր Պուտինի հատուկ ներկայացուցիչ Կիրիլ Դմիտրիևն այս շաբաթ կայցելի Վաշինգտոն՝ հանդիպելու Մերձավոր Արևելքի հարցերով Դոնալդ Թրամփի հատուկ բանագնաց Սթիվ Ուիթկոֆի հետ։ Այս մասին հայտնում է CNN-ը՝ վկայակոչելով երեք աղբյուրների։
Սա կլինի Վաշինգտոն ռուս բարձրաստիճան պաշտոնյայի առաջին այցը բանակցությունների համար՝ 2022 թվականին Ռուսաստանի կողմից Ուկրաինա ներխուժումից հետո: Դմիտրիևը Պուտինի մտերիմ խորհրդականն է և փետրվարին ռուս բարձրաստիճան պաշտոնյաների հետ մեկնել էր Սաուդյան Արաբիա՝ սկսելու Ուկրաինայի պատերազմին վերջ դնելու շուրջ քննարկումները: Նա նաև աշխատել է Ուիթկոֆի հետ՝ ապահովելու ամերիկացի ուսուցիչ Մարկ Ֆոգելի ազատ արձակումը ռուսական բանտից, ինչը Թրամփի վարչակազմը ողջունել էր որպես բարի կամքի ժեստ:
Դմիտրիևը ԱՄՆ պատժամիջոցների տակ է։ Աղբյուրներից մեկն ասել է, որ ԱՄՆ կառավարությունը ժամանակավորապես չեղարկել է սահմանափակումները՝ թույլ տալու համար Պետքարտուղարությանը նրան վիզա տրամադրել։ Մեկ ուրիշն էլ նշել է, որ պատժամիջոցների ժամանակավոր կասեցման մասին հարցումն ուղարկվել է ԱՄՆ ֆինանսների նախարարություն:
Պետքարտուղարության խոսնակը CNN-ին ասել է, որ «վիզաների մասին գրառումները գաղտնի են ԱՄՆ օրենսդրության համաձայն», ուստի նրանք «չեն կարող մեկնաբանել առանձին վիզայի դեպքերը»:
Լրատվամիջոցը դիմել է նաև Սպիտակ տուն։ Ֆինանսների նախարարության խոսնակը մերժել է մեկնաբանության խնդրանքը: Մեկնաբանությունից հրաժարվել է նաև Դմիտրիևի ներկայացուցիչը։
Ինքը՝ Դմիտրիևը, X-ի իր միկրոբլոգում, ի պատասխան բլոգեր Մարիո Նաուֆալի, որը հրապարակել է CNN-ի հեռարձակումից մի հատված, գրել է․ «Միգուցե։ ԱՄՆ-ի և Ռուսաստանի միջև երկխոսությանը դիմադրություն կա, որը սնուցվում է արմատացած շահերով և հին պատմություններով: Բայց հնարավոր է՝ բարելավված հարաբերությունները հենց այն են, ինչ աշխարհին անհրաժեշտ է տևական գլոբալ անվտանգության և խաղաղության համար»։
Թարգմանությունը՝ Էմմա Չոբանյանի
