31.03.2025 | 22:59
Հաստատվել է հանրակրթական ուսումնական հաստատության ղեկավարման հավաստագրի համար հավակնորդների քննության ժամանակացույցը
Բրիտանիան Ադրբեջանի իշխանություններին կոչ է անում ապահովել ձերբակալված հայերի արդար դատավարությունն ու ապահով պայմաններ ստեղծել նրանց համար
Քաղաքականություն
25.03.2025 | 21:12
Բրիտանական խորհրդարանի Լորդերի պալատի անդամ, լորդ եպիսկոպոս Ֆիլիպ Մաունստեֆեն դիմել է երկրի ԱԳՆ-ին՝ խնդրելով մեկնաբանել Բաքվում հայերի շինծու դատավարությունները։ Նա Կառավարությանը հարց է ուղղել՝ ի՞նչ են նրանք ներկայացրել Ադրբեջանի կառավարությանը 2023 թվականի սեպտեմբերին Լեռնային Ղարաբաղից վերցված 23 հայ պատանդների նկատմամբ շարունակվող կալանավորման և վատ վերաբերմունքի վերաբերյալ, ի՞նչ քայլեր են ձեռնարկում միջազգային գործընկերների հետ համաձայնեցված՝ ապահովելու համար, որ Ադրբեջանը կատարի միջազգային իրավունքով ստանձնած պարտավորությունները:
Ի պատասխան՝ Արտաքին գործերի, համագործակցության և զարգացման նախարարությունը նշել է, որ Մեծ Բրիտանիան կոչ է անում Ադրբեջանի իշխանություններին՝ ապահովել, որպեսզի 2023 թվականի սեպտեմբերին Լեռնային Ղարաբաղում ռազմական գործողության ընթացքում ձերբակալվածներն արդար դատավարության հնարավորություն ունենան, ապահովվեն անվտանգ պայմաններ՝ Ադրբեջանի ստանձնած միջազգային պարտավորություններին համապատասխան։
«Բաքվում մեր դեսպանատունը մեծ ուշադրություն է դարձնում այս դեպքերին և պարբերաբար թարմացնում է տեղեկատվությունը՝ առաջընթացի մասին տեղեկացված լինելու համար: Մենք նաև հետևողականորեն կոչ ենք անում ազատ արձակել մնացած բոլոր ռազմագերիներին։ Պետնախարար Սթիվեն Դոութին այս հարցերը բարձրացրել է Ադրբեջանի նախագահի խորհրդական Էլչին Ամիրբեկովի հետ հոկտեմբերին Մեծ Բրիտանիա կատարած այցի ժամանակ։ Մարտի 10-ին Ադրբեջանի նախագահի գլխավոր խորհրդական Հիքմեթ Հաջիևի հետ հանդիպման ժամանակ պետնախարարը նաև հորդորել է Ադրբեջանին՝ օգտվել Հայաստանի հետ պատմական խաղաղության պայմանագիր կնքելու հնարավորությունից»,- ասվում է հայտարարության մեջ։
Նշվում է, որ այդ ուղերձները փոխանցել են նաև երկրի վարչապետն ու արտգործնախարարը։
Թարգմանությունը՝ Էմմա Չոբանյանի
