22.06.2026 | 07:05
ԱԱ-2026. Եգիպտոսը կամային հաղթանակ տարավ. ՏԵՍԱՆՅՈՒԹ
Քաղաքական մրցակիցները չպետք է բանտում հայտնվեն․ ԵՄ-ն քննադատել է Էքրեմ Իմամօղլուի ձերբակալումը
Քաղաքականություն
25.03.2025 | 16:22
ԵՄ-ն ու անդամ մի շարք երկրներ անդրադարձել են Թուրքիայի իշխանությունների կողմից Ստամբուլի ընդդիմադիր քաղաքապետ Էքրեմ Իմամօղլուի ձերբակալությանն ու դրան հաջորդած կալանավորմանը։
«Թուրքիայի հավատարմությունը ԵՄ-ին անդամակցելուն ավելի ու ավելի դատարկ է հնչում՝ Իմամօղլուի և մյուսների դեմ ձեռնարկված գործողությունների լույսի ներքո: Քաղաքական մրցակիցները չպետք է բանտ նստեն կամ կանգնեն դատարանի առաջ։ Երկիրը, որն իր ապագան տեսնում է ԵՄ-ում, պետք է հարգի օրենքի գերակայությունը»,- X-ի իր միկրոբլոգում գրել է Գերմանիայի ԱԳ նախարար Աննալենա Բերբոքը։
Նա նշել է, որ աշխարհաքաղաքական անհանգիստ ժամանակներում համագործակցությունը պահանջում է ժողովրդավարական Թուրքիա՝ հիմնված օրենքի գերակայության վրա՝ ուժեղ քաղաքացիական հասարակությունով, որը թուրք ժողովուրդն է կառուցել վերջին 100 տարվա ընթացքում:
Ֆրանսիայի ԱԳՆ-ն էլ ավելի տարածած հայտարարության մեջ ընդգծել էր, որ Ստամբուլի քաղաքապետ Էքրեմ Իմամօղլուի և շատ այլ հայտնի գործիչների կալանավորումը լուրջ հարձակում է ժողովրդավարության վրա։
«Ֆրանսիան վերահաստատում է իր խորը մտահոգությունն այս հարցում։ Ընտրված ընդդիմության ներկայացուցիչների իրավունքների հարգումը, ցույցերի ազատությունը և խոսքի ազատությունն օրենքի գերակայության հիմնաքարերն են։ Որպես Եվրոպայի խորհրդի անդամ և Եվրամիության անդամության թեկնածու երկիր՝ Թուրքիան կամավոր պարտավորություններ է ստանձնել այս ոլորտում»,- ասվում է հայտարարության մեջ։
Եվրահանձնաժողովն էլ Թուրքիային կոչ է արել «պահպանել ժողովրդավարական արժեքները»՝ որպես Եվրախորհրդի անդամ և ԵՄ թեկնածու երկիր։
«Մենք ցանկանում ենք, որ Թուրքիան խարսխված մնա Եվրոպային, բայց դա պահանջում է հստակ հավատարմություն ժողովրդավարական նորմերին և գործելակերպին»,- լրագրողներին նախօրեին ասել էր հանձնաժողովի խոսնակ Գիյոմ Մերսիեն:
Թարգմանությունը՝ Էմմա Չոբանյանի
