22.06.2026 | 10:48
Արտարժույթների փոխարժեքները՝ հունիսի 22-ի դրությամբ
Թուրքիայի ԱԳ նախարարը կոչ է արել ամերիկյան զորքերը դուրս բերել Սիրիայից
Քաղաքականություն
21.03.2025 | 17:03
Թուրքիայի ԱԳ նախարար Հաքան Ֆիդանը կոչ է արել ամերիկյան զորքերը դուրս բերել Սիրիայից՝ ենթադրելով, որ դա արդյունավետ որոշում կլինի Վաշինգտոնի համար, գրում է Turkiye today-ը։
Ֆիդանը նշել է, որ Թուրքիայի նախագահ Ռեջեփ Թայիփ Էրդողանը և ԱՄՆ նախագահ Դոնալդ Թրամփը «շատ դրական» զրույց են ունեցել, որի ընթացքում ակնհայտ է Թրամփի հարգանքը Էրդողանի նկատմամբ։ Նա, միաժամանակ, ասել է, որ Անկարան զգուշավոր է մնում Սիրիայի նախագահ Ահմադ ալ-Շարաայի և քրդերի միջև ստորագրած համաձայնագրի առնչությամբ՝ ընդգծելով, որ Թուրքիան կարճաժամկետ հեռանկարում ուշադիր հետևելու է գործընթացին։
«Մյուս կողմից, ամերիկյան բանակի ներկայությունը Սիրիայում իր գինն ունի։ Ամերիկյան հասարակական կարծիքում կասկածի տակ են դրվում Սիրիայում ԱՄՆ ռազմական ներկայության շարունակական օգուտները: Նախկինում Սիրիայում կային Իրանը, Ռուսաստանը և Ասադի ռեժիմը։ Սակայն այժմ իրավիճակը փոխվել է։ Նախագահ Թրամփը պետք է համոզված լինի ամերիկյան զորքերի հետագա ներկայության անհրաժեշտության հարցում։ Եթե ԱՄՆ-ը դուրս բերի իր բանակը, դա նրանց համար ավելի քիչ ծախսատար կլինի»,- նշել է Թուրքիայի ԱԳ նախարարը։
Ֆիդանը նաև հայտարարել է, որ Թուրքիան կարող է նպաստել Ուկրաինայում խաղաղապահ ուժերի ստեղծմանը, «եթե կողմերը համաձայնեն ստեղծել» այն՝ որպես Ռուսաստան-Ուկրաինա հակամարտությունը կարգավորելու ջանքերի մի մաս:
Թարգմանությունը՝ Էմմա Չոբանյանի
