06.12.2025 | 18:41
Տավուշի մարզի պարեկները ձկնագողության դեպք են բացահայտել. վնասի չափը՝ շուրջ 470 հազար դրամ. ՆԳՆ
Թեհրանն առաջիկայում արաբական երկրի միջոցով կստանա Թրամփի նամակը․ Իրանի ԱԳ նախարար
Քաղաքականություն
12.03.2025 | 14:31
Իրանի ԱԳ նախարար Աբբաս Արաղչին հայտարարել է, որ ԱՄՆ նախագահ Դոնալդ Թրամփի նամակը արաբական երկրի ներկայացուցչի կողմից առաջիկա օրերին տեղ կհասցվի, գրում է Mehr գործակալությունը։
Նա նշել է, որ թեև Դոնալդ Թրամփը նամակ է գրել, իրանցի պաշտոնյաներն այն դեռևս չեն ստացել։
«Նամակը գրվել է, սակայն մեզ դեռ չի հասել»,- ասել է Արաղչին՝ հավելելով, որ պայմանավորվածություններ են ձեռք բերվել, որպեսզի արաբական երկրի հատուկ բանագնացը մոտ օրերս նամակը հասցնի Թեհրան։
Ինչ վերաբերում է Իրանի միջուկային ծրագրին, Արաղչին վերահաստատել է Թեհրանի հանձնառությունը խաղաղ միջուկային զարգացմանն ու շարունակվող բանակցություններին։
«Իրանի Իսլամական Հանրապետությունը միշտ բաց է եղել բանակցությունների համար, սակայն այդ բանակցությունները պետք է լինեն արդար և հարգալից։ Մենք նախկինում բանակցել ենք JCPOA-ի շուրջ և շարունակում ենք քննարկումներն այսօր։ Չնայած ԱՄՆ-ը վաղուց դուրս է եկել համաձայնագրից, մենք դեռ բանակցություններ ենք վարում եվրոպական երեք երկրների հետ։ Երկու շաբաթ առաջ կայացել է բանակցությունների չորրորդ փուլը, և շուտով սպասվում է նոր փուլ։ Միաժամանակ, մենք շարունակում ենք մեր քննարկումները Չինաստանի և Ռուսաստանի հետ, և ուրբաթ օրը եռակողմ հանդիպում կանցկացվի Իրանի, Չինաստանի և Ռուսաստանի միջև»,- ասել է նա՝ նշելով, որ Իրանը մնում է Միջուկային զենքի չտարածման պայմանագրի (NPT) կողմ, և որ նրա միջուկային ծրագիրը լիովին համապատասխանում է իր միջազգային պարտավորություններին։
Հիշեցնենք, որ ավելի վաղ ԱՄՆ նախագահ Դոնալդ Թրամփը հայտարարել էր, որ ցանկանում է բանակցություններ վարել Թեհրանի հետ միջուկային ծրագրի շուրջ և նամակ է ուղարկել Իրանի գերագույն հոգևոր առաջնորդին։
Թարգմանությունը՝ Էմմա Չոբանյանի
