10.08.2026 | 10:49
Հայ շախմատիստները մասնակցում են «Spilimbergo International 2026»-ին
ԱՄՆ պետքարտուղարը հայտարարել է, որ Ուկրաինան «ստիպված կլինի տարածքային զիջումների գնալ»
Քաղաքականություն
11.03.2025 | 11:26
Ուկրաինան ստիպված կլինի զիջել 2014 թվականից ի վեր Ռուսաստանի կողմից զավթված տարածքների մի մասը՝ պատերազմին վերջ տալու ցանկացած համաձայնության համար: Այս մասին հայտարարել է ԱՄՆ պետքարտուղար Մարկո Ռուբիոն՝ բանակցությունների համար Սաուդյան Արաբիա մեկնելուց առաջ, գրում է Politico-ն։
Ռուբիոն ասել է, որ զիջումները լայնամասշտաբ ներխուժմանը վերջ դնելու «միակ ճանապարհն են»։
«Նրանք [ուկրաինացիները] շատ են տուժել, նրանց ժողովուրդը մեծապես տուժել է: Եվ նման բանից հետո դժվար է նույնիսկ խոսել զիջումների մասին։ Բայց դա միակ ճանապարհն է՝ դրան վերջ դնելու, ավելի մեծ տառապանքը կանխելու համար»,- ասել է Ռուբիոն։
Նշելով, որ ինքը «չի պատրաստվում որևէ բան նախապես բանակցել», Ռուբիոն հավելել է, որ ամերիկյան կողմը կփորձի հասկանալ, թե ինչ է «պատրաստ Կիևն անել խաղաղության հասնելու և պատերազմին վերջ դնելու համար»։
«Դա կարող է անհամատեղելի լինել այն ամենի հետ, ինչ պատրաստ են անել ռուսները։ Դա այն է, ինչ մենք պետք է պարզենք»,-ասել է նա։
Ռուբիոն նաև ակնարկել է, որ Ուկրաինային օգնությունը կարող է նորից սկսվել՝ կախված առաջիկա բանակցությունների արդյունքներից՝ ասելով, որ ԱՄՆ-ը «կարող է լավ նորություն հայտնել այդ ճակատում»:
«Այդ ամենը տեղի ունեցավ այն պատճառով, որ մենք զգացինք, որ նրանք հավատարիմ չեն որևէ խաղաղ գործընթացի կամ շահագրգռված չեն բանակցություններով։ Եթե դա փոխվի, ապա ակնհայտորեն մեր կեցվածքը կարող է փոխվել»,- ասել է ԱՄՆ պետքարտուղարը։
Հավելենք, որ այսօր Սաուդյան Արաբիայում տեղի կունենան ամերիկյան և ուկրաինական պատվիրակությունների բանակցությունները։
Թարգմանությունը՝ Էմմա Չոբանյանի
