07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Էրդողանը Պուտինին կրկին Թուրքիա է հրավիրել
Քաղաքականություն
28.02.2025 | 13:54
Թուրքիայի նախագահ Ռեջեփ Թայիփ Էրդողանը կրկին ՌԴ նախագահ Վլադիմիր Պուտինին հրավիրել է իր երկիր՝ նրան անվանելով իր մեծ ընկերը։ Այս մասին լրագրողներին ասել է ՌԴ Դաշնային խորհրդի խոսնակ Վալենտինա Մատվիենկոն՝ անդրադառնալով Ստամբուլում նախօրեին Էրդողանի հետ տեղի ունեցած հանդիպմանը, գրում է ՏԱՍՍ-ը։
«Հանդիպումը շատ հետաքրքիր էր, բովանդակալից: Նախագահ Էրդողանը խնդրեց ինձ ևս մեկ անգամ փոխանցել, որ Վլադիմիր Պուտինին շատ են սպասում այցով Թուրքիայում: Նա նրան անվանեց իր մեծ ընկերը: Բոլորս գիտենք, որ նրանք իսկապես շատ լավ անձնական հարաբերություններ ունեն»,- պատմել է Մատվիենկոն։
Նա տեղեկացրել է, որ Էրդողանի հետ հանդիպմանը քննարկվել է նաև պատժամիջոցների համատեքստում երկու երկրների հարաբերությունների զարգացումը։
«Նա աջակցել է միջտարածաշրջանային փոխգործակցության և համագործակցության առավել ակտիվ զարգացմանը, որով ակտիվորեն զբաղվում է Դաշնային խորհուրդը։ Մեր ղեկավարները սահմանել են նվազագույնը 100 միլիարդ դոլարի փոխադարձ ապրանքաշրջանառության հասնելու նշաձողը։ Ելնելով անցյալ տարվա արդյունքներից՝ այն դեռ 54 միլիարդ է, բայց եթե վերացնենք այն խոչընդոտները, որոնք մեզ խանգարում են գործնականում աշխատել, ապա, իհարկե, նման հնարավորություն կա»,- եզրափակել է Մատվիենկոն։
Հավելենք, որ ՌԴ Դաշնային խորհրդի խոսնակը Թուրքիայում բանակցություններ է անցկացրել նաև Թուրքիայի Ազգային Մեծ ժողովի նախագահ Նուման Քուրթուլմուշի հետ։
Թարգմանությունը՝ Էմմա Չոբանյանի
