18.02.2026 | 12:00
Փաշինյանն ԱՄՆ է մեկնում // ՀՀ-ում ԵՄ դիտորդական առաքելությունը նոր ղեկավար ունի․ ԼՈՒՐԵՐ
Պատմական հայտարարություն․ Օջալանը PKK-ին կոչ է արել վայր դնել զենքերն ու ինքնալուծարվել
Քաղաքականություն
27.02.2025 | 19:46
Քուրդիստանի աշխատավորական կուսակցության (PKK) բանտարկված առաջնորդ Աբդուլլահ Օջալանը կոչ է արել իր խմբավորմանը վայր դնել զենքերը և ցրվել։ Այս մասին ասվում է Ստամբուլում ընթերցված հռչակագրում։
Հայտարարության քրդերեն տարբերակն ընթերցել է վետերան քաղաքական գործիչ Ահմեթ Թյուրքը, իսկ DEM կուսակցության պատգամավոր Փերվին Բուլդանը՝ թուրքերեն տարբերակը։
«Բոլոր զինված խմբավորումները պետք է վայր դնեն իրենց զենքերը, իսկ PKK-ն պետք է ցրվի»,- ասել է նա հայտարարության մեջ, որն ընթերցել է քրդամետ «Ժողովուրդների հավասարություն և ժողովրդավարություն» կուսակցության (DEM) օրենսդիրների պատվիրակությունը:
Օջալանն ասել է, որ «պատմական» պատասխանատվություն է վերցրել իր կոչի համար՝ միաժամանակ երախտագիտություն հայտնելով նախագահ Ռեջեփ Թայիփ Էրդողանին և ծայրահեղ աջ «Ազգայնական շարժում» կուսակցության (MHP) առաջնորդ Դևլեթ Բահչելիին՝ խաղաղության հասնելու գործում աջակցության համար։
«Պարոն Դևլեթ Բահչելիի կոչը, պարոն նախագահի արտահայտած կամքը և քաղաքական կուսակցությունների դրական արձագանքներն ակնկալվող կոչին ստեղծել են մի միջավայր, որտեղ ես կոչ եմ անում վայր դնել զենքերը և ստանձնում եմ այս կոչի պատմական պատասխանատվությունը»,- ասվում է Օջալանի հայտարարության մեջ։
«Ժողովրդավարական հասարակության կարիքն անխուսափելի է։ PKK-ը՝ հանրապետության պատմության մեջ ամենաերկար և լայնածավալ ապստամբությունն ու զինված շարժումը, սոցիալական հիմք ու աջակցություն է գտել և առաջին հերթին ոգեշնչված էր ժողովրդավարական քաղաքականության ուղիների փակ լինելու փաստով»,- ասել է Օջալանը`նշելով,որ «առանձին ազգային պետությունը, դաշնությունը, վարչական ինքնավարությունը կամ մշակութային լուծումները չեն կարողանում պատասխանել հասարակության պատմական սոցիոլոգիային»։
Նա հորդորել է PKK-ին համագումար հրավիրել և պաշտոնապես որոշել զենքերը վայր դնելու մասին։
«Ինչպես ցանկացած ժամանակակից համայնքի և կուսակցության դեպքում, որի գոյությունը բռնի ուժով չի վերացվել, դուք պետք է կամավոր գումարեք ձեր համագումարը և որոշում կայացնեք։ Բոլոր խմբավորումները պետք է վայր դնեն զենքերը, իսկ PKK-ն պետք է ինքնալուծարվի»,- հավելել է նա։
Օջալանը, սակայն, չի հստակեցրել, թե ինչ քայլեր կձեռնարկի թուրքական կառավարությունը՝ ուղղված ավելի լայն քաղաքական և մշակութային իրավունքների վերաբերյալ քրդերի պահանջներին: Նա չի նշել նաև PKK-ի կողմից զենքերը վայր դնելու որևէ նախապայման։
Հիշեցնենք, որ քրդամետ կուսակցության պատվիրակությունն այսօր բանտում այցելել էր Օջալանին։
Թարգմանությունը՝ Էմմա Չոբանյանի
