06.11.2026 | 21:27
Հրշեջ-փրկարարները մարել են Ձորաղբյուր բնակավայրում բռնկված հրդեհը
Աշխատանքի խոստումով տարել են Ռուսաստան, ծեծել ու ստիպել զինվորական պայմանագիր ստորագրել․ 21-ամյա ղրղզստանցուն պատրաստում են Ուկրաինայի դեմ պատերազմ ուղարկելու
Քաղաքականություն
06.11.2026 | 20:44
Ղրղզստանի արտաքին գործերի նախարարությունը նոտա է հղել Ռուսաստանի ԱԳՆ՝ պահանջելով «հնարավորինս շուտ վերադարձնել» երկրի քաղաքացուն, որը գտնվում է ռուսական զորամասերից մեկում։ Այս մասին նշվում է գերատեսչության հաղորդագրության մեջ։
Azattyk Asia-ի փոխանցմամբ՝ խոսքը 21-ամյա Էլիստան Տոկտոգուլովի մասին է։ Նրա հարազատներն ու ընկերները նոյեմբերի 3-ին Մանասում տեսագրված տեսանյութ են հրապարակել՝ պնդելով, որ նրան հարկադրել են պայմանագիր ստորագրել և ուղարկել Վորոնեժ՝ ռազմական պատրաստություն անցնելու, որից հետո նրան պետք է ուղարկեն Ուկրաինայի դեմ պատերազմին մասնակցելու։
Տեսանյութում նրա ավագ եղբայրը պատմում է, որ Էլիստանը Instagram-ում աշխատանք փնտրելիս ծանոթացել էր Ռուսաստանում բնակվող Ղրղզստանի քաղաքացու հետ։ Վերջինս նրան աշխատանք էր առաջարկել Ռուսաստանում՝ ամսական 105-110 հազար ռուբլի աշխատավարձով։ Արդյունքում նրա համար տոմս են գնել։ Հոկտեմբերի 28-ին նա մեկնել է Մոսկվա և տեղավորվել հյուրանոցներից մեկում։
«Տեղում՝ հյուրանոցում նրան դիմավորել է մեկ այլ անձ՝ Ռուսաստանի քաղաքացի։ Նա վերցրել է նրա անձնագիրը և ասել՝ «Հանգստացեք»։ Գիշերը՝ մոտավորապես ժամը 3-ին, նրան տարել են անհայտ մեքենայով մեկ այլ վայր և ծեծի ենթարկել։ Քանի որ նա ռուսերեն չգիտի, նրան ստիպել են ստորագրել բոլոր փաստաթղթերը, որից հետո տեղափոխել են Վորոնեժի ուսումնական կենտրոն»,- հայտարարել է եղբայրը։
Ղրղզստանի ԱԳՆ-ում հայտնել են, որ Մոսկվայում երկրի դեսպանատունը դիմումներ է ուղարկել Ռուսաստանի իրավասու մարմիններին՝ պահանջելով ստուգում անցկացնել այս միջադեպի առնչությամբ, պարզել մեղավորներին և նրանց պատասխանատվության ենթարկել։ Նշվում է, որ դիվանագիտական ներկայացուցչությունը մշտական կապի մեջ է Տոկտոգուլովի հարազատների հետ։
Հայտնի չէ, թե ընդհանուր առմամբ Ղրղզստանի քանի քաղաքացի է մասնակցում Ուկրաինայի դեմ պատերազմին՝ Ռուսաստանի կողմից։ Պաշտոնական տվյալներ չեն հրապարակվել։ Ուկրաինայի պետական «Хочу жить» նախագծի պնդմամբ՝ 2022 թվականից ի վեր պատերազմին մասնակցել է Ղրղզստանի 2219 քաղաքացի։
Նախագծի տվյալներով՝ Ուկրաինա Ռուսաստանի լայնածավալ ներխուժման սկզբից ի վեր Մոսկվան իր բանակում ծառայելու համար հավաքագրել է Կենտրոնական Ասիայի հինգ երկրների՝ Ղազախստանի, Ուզբեկստանի, Ղրղզստանի, Թուրքմենստանի և Տաջիկստանի 20,437 քաղաքացիների։ Նշվում է, որ նրանք կազմում են ռուսական բանակում հայտնաբերված օտարերկրյա քաղաքացիների ընդհանուր թվի 44 տոկոսը։
Ավելի վաղ Ռուսաստանի բանակում ծառայելու և Ուկրաինայի դեմ պատերազմին մասնակցելու նպատակով հավաքագրված իր քաղաքացիներին վերադարձնելու գործընթաց էր սկսել նաև Ղազախստանը։ Արդյունքում մի քանի ղազախստանցիներ վերադարձել են հայրենիք։
Թարգմանությունը՝ Էմմա Չոբանյանի
