Գերմանիայում մեկնարկել են Բունդեսթագի արտահերթ ընտրությունները

Փետրվարի 23-ին, տեղական ժամանակով 08:00-ից, Գերմանիայում բացվել են ընտրատեղամասերը՝ Բունդեսթագի արտահերթ ընտրությունների իրականացման համար․ գրում է Deutsche Welle-ն։

Երկրում ընտրելու իրավունք ունի շուրջ 59,2 միլիոն քաղաքացի, որոնցից 24,9 միլիոնը (42%) 60-ից բարձր տարիքի են։ Իսկ 2,3 միլիոն երիտասարդ (3,9%) առաջին անգամ են մասնակցում դաշնային ընտրություններին։

Գերմանիայի շուրջ 200 000 քաղաքացի գրանցվել է արտասահմանում քվեարկելու համար, թեև նրանց ընդհանուր թիվը գնահատվում է 3-4 միլիոն։ Սակայն, նրանց մասնակցության մակարդակը սովորաբար ցածր է՝ պայմանավորված բյուրոկրատական դժվարություններով և քվեաթերթիկները փոստով Գերմանիա ուղարկելու պահանջով։

Ընդհանուր առմամբ, ընտրություններին մասնակցում են 29 քաղաքական կուսակցություններ։ Բոլոր 16 դաշնային երկրամասերում ընտրություններին ներկայացված են 10 հիմնական կուսակցություններ.

– Գերմանիայի սոցիալ-դեմոկրատական կուսակցությունը (ՍԴԿ)
– «Կանաչներ» («Սոյուզ-90»/«Կանաչներ»)
– Ազատ դեմոկրատական կուսակցությունը (ԱԴԿ)
– «Գերմանիայի այլընտրանք» (ԳԱ)
– Ձախ կուսակցությունը
– Սառա Վագենկնեխտի միություն (ՍՎՄ)
– Ազատ ընտրողներ
– Volt կուսակցությունը
– Գերմանիայի մարքսիստա-լենինյան կուսակցությունը
– Գերմանիայի դաշինք կուսակցությունը

Քրիստոնեա-դեմոկրատական միությունը (ՔԴՄ) մասնակցում է 15 երկրամասերում, բացառությամբ Բավարիայի, որտեղ ավանդաբար հանդես է գալիս նրա գործընկեր Քրիստոնեա-սոցիալական միությունը (ՔՍՄ)։