Երուսաղեմի Հայոց պատրիարքարանն ահազանգում է՝ Իսրայելի իշխանությունները ցանկանում են բռնագանձել իրեն պատկանող անշարժ գույքը

Երուսաղեմի Հայոց պատրիարքարանն ահազանգում է, որ տեղի հայկական թաղամասի կրոնական սուբյեկտի դեմ «անարդարացի, նպատակային ու կործանարար հարկեր են գանձվում»։ Այդ սպառնալիքը կարող է նախադեպ դառնալ Երուսաղեմի բոլոր քրիստոնյա համայնքների համար, ասվում է պատրիարքարանի X-ի միկրոբլոգում տարածած հայտարարության մեջ։

Երուսաղեմի Հայոց պատրիարքարանի կողմից ներկայացված վարչական միջնորդության (ATM 1470-02-24) դատական ​​նիստը նշանակված է երկուշաբթի՝ փետրվարի 24-ին։ Միջնորդությունը ներկայացվել է՝ նպատակ ունենալով դադարեցնել դարեր շարունակ Պատրիարքարանին պատկանող անշարժ գույքի բռնագրավման գործընթացը՝ 1994 թվականից ի վեր, իբր, կուտակված արնոնայի (քաղաքային հարկ) պարտքերը հավաքագրելու նպատակով:

«Եթե, Աստված մի արասցե, Պատրիարքարանի միջնորդությունը մերժվի, ապա Երուսաղեմի քաղաքապետարանը կբռնագրավի Պատրիարքարանի անշարժ գույքը և աճուրդի կհանի, որպեսզի գանձի վիճելի պարտքերը, որոնք երբևէ չեն ապացուցվել դատարանում և, գործող պրակտիկայի համաձայն, երբեք չեն հավաքագրվել»,- ասվում է հայտարարության մեջ։

Նշվում է, որ դիմումն ուղղված է պարտքերի հավաքագրման պաշտոնյայի՝ Երուսաղեմի քաղաքապետարանի աշխատակցի գործողություններին, որը «որոշել է», որ Պատրիարքարանն աստղաբաշխական պարտք ունի՝ առանց վաղեմության ժամկետը հաշվի առնելու և առանց ենթադրյալ պարտքի հիմքի հստակ սահմանման։ Բացի այդ, ենթադրյալ պարտքի զգալի մասը վերաբերում է գույքին, որն իրականում վարձակալության է տրվում Երուսաղեմի քաղաքապետարանին։

Եթե միջնորդությունը մերժվի, ոչ միայն քաղաքապետարանին կթույլատրվի անհապաղ վերսկսել որոշակի գույքի բռնագրավումը, այլև կստեղծի վտանգավոր իրավական նախադեպ, որը կարող է օրինականացնել սեփականության իրավունքի օտարումը և Իսրայելի քրիստոնեական կրոնական հաստատություններին ու համայնքներին պատկանող ակտիվների կամավոր լուծարումը:

Կառույցի տեղեկություններով՝ Հայոց պատրիարքարանը միակ քրիստոնեական համայնքն է, որն ընտրվել է և, հնարավոր է, թիրախավորված է այս հարցով։ Նշվում է, որ պատրիարքարանի դեմ գործ հարուցելը, նրան ստիպելը՝ վճարել ենթադրյալ պարտքը և, առավել ևս, նրա ունեցվածքի բռնագրավումը, կարող է վտանգել Հայոց պատրիարքարանի երկարամյա առաքելությունը Սուրբ Երկրում, որն ակտիվ է 7-րդ դարից: Ավելին, դա կարող է սպառնալ հայ համայնքի շարունակական ներկայությանը Սուրբ Երկրում, որը թվագրվում է 4-րդ դարով:

«Սա քաղաքապետարանի կողմից բացահայտ փորձ է՝ խարխլելու Հայոց պատրիարքարանը՝ առանձնացնելով այն տնտեսական ճնշումներով, որպեսզի նվազեցնի նրա ներկայությունը Սուրբ Երկրում։ Այն կարող է բացասական ազդեցություն ունենալ Սուրբ Երկրում քրիստոնեական ընդհանուր ներկայության, ինչպես նաև տարածաշրջանում ներկայում գործող բոլոր քրիստոնեական հաստատությունների գործունեության վրա։ Կոչ ենք անում Իսրայելի վարչապետ Բենիամին Նեթանյահուին, Ներքին գործերի նախարար Մոշե Արբելին և Կառավարական կոմիտեի ղեկավար պարոն Ցաչի Հանեգբիին վճռականորեն միջամտել և անհապաղ սառեցնել քաղաքապետարանի կողմից Երուսաղեմի Հայոց պատրիարքարանի դեմ իրականացվող բոլոր գործողությունները»,- ասվում է հայտարարության մեջ։

Թարգմանությունը՝ Էմմա Չոբանյանի