Ուկրաինան չի մասնակցում Սաուդյան Արաբիայի բանակցություններին և չի ճանաչի դրանք․ Զելենսկի

Ուկրաինան չի մասնակցելու Սաուդյան Արաբիայի բանակցություններին և չի ճանաչի Ուկրաինայի վերաբերյալ որևէ համաձայնագիր՝ առանց Կիևի մասնակցության։ Այս մասին հայտարարել է Ուկրաինայի նախագահ Վլադիմիր Զելենսկին, փոխանցում է Ինտերֆաքս Ուկրաինան։

«Ուկրաինան չի մասնակցելու։ Ուկրաինան այդ մասին չի իմացել։ Իսկ Ուկրաինայի շուրջ առանց Կիևի մասնակցության բանակցությունները գնահատում ենք անարդյունք։ Եվ մենք չենք կարող ճանաչել ցանկացած բան կամ ցանկացած պայմանավորվածություն մեր մասին՝ առանց մեզ։ Եվ մենք չենք ճանաչի նման պայմանավորվածությունները»,- ասել է Զելենսկին լրագրողներին՝ մեկնաբանելով Սաուդյան Արաբիայում ՌԴ-ի և ԱՄՆ-ի ներկայացուցիչների միջև բանակցությունների մասին հարցը։

Նա նշել է, որ այս բանակցություններում կա երկկողմանի ուղղվածություն, «և նրանք իրավունք ունեն դա անել, եթե ունեն երկկողմանի խնդիրներ»։

Ուկրաինայի նախագահի խոսքով՝ իր պաշտոնական այցը Սաուդյան Արաբիա, որը տեղի կունենա վաղը, «կապ չունի այն բաների հետ, որոնք տեղի են ունենում Սաուդյան Արաբիայում՝ ԱՄՆ-ի և Ռուսաստանի ներկայացուցիչների մակարդակով»։ Նա հավելել է, որ բանակցությունների մասին կհարցնի Սաուդյան Արաբիայի թագաժառանգ և վարչապետ Մուհամեդ բեն Սալմանին։

Զելենսկին հայտնել է՝ իր այցի ընթացքում բարձրացնելու է նավթի գների իջեցման հարցը և կարծում է, որ ԱՄՆ նախագահ Դոնալդ Թրամփը կարող է դա անել։

«Ես չգիտեմ, թե ում կհաջողվի իջեցնել գները: Ես կարծում եմ, որ նախագահ Թրամփն ունի դրա համար ամենամեծ ռեսուրսը, որ նա ամենաուժեղն է էներգետիկայի ոլորտում։ Եվ ես կարծում եմ, որ եթե նա նպատակ դնի, կարող է դա անել»,- հավելել է Ուկրաինայի նախագահը։

Թարգմանությունը՝ Էմմա Չոբանյանի