28.04.2025 | 09:38
ՀՀ տարածքում ավտոճանապարհները հիմնականում անցանելի են
ANCA-ն կոչ է արել Թուլսի Գաբարդին հետաքննել ԱՄՆ-ի ձախողումները Ադրբեջանի կողմից Արցախի էթնիկ զտումների հարցում
Քաղաքականություն
13.02.2025 | 16:44
Ամերիկայի Հայ դատի հանձնախումբը (ANCA) շնորհավորել է ԱՄՆ նախկին կոնգրեսական Թուլսի Գաբարդին Ազգային հետախուզության (DNI) տնօրենի պաշտոնում նշանակվելու կապակցությամբ և կոչ է արել համապարփակ հետաքննություն սկսել ԱՄՆ հետախուզության, քաղաքականության և արտաքին օգնության ձախողումների վերաբերյալ, որոնք նպաստել են Ադրբեջանի կողմից Արցախի բնիկ հայ բնակչության ցեղասպանական էթնիկ զտմանը։
Գաբարդին ուղղված շնորհավորական նամակում ANCA-ն ընդգծել է հետախուզության պաշտոնական վերանայման կարևորությունը, թե ինչպես է ԱՄՆ քաղաքականությունը, ինչպես, օրինակ, ռազմական օգնությունն Ադրբեջանին, նպաստել նրա ռազմական հանցագործություններին:
«Ինչպես գիտեք՝ Հավայան կղզիներում և ամբողջ Միացյալ Նահանգներում հայկական ծագում ունեցող ամերիկացիները երկար ժամանակ աջակցել են ձեր ղեկավարությանը վայրագությունների կանխարգելման, մարդու իրավունքների և մեր համայնքի և կոալիցիոն գործընկերների համար հատուկ մտահոգություն ներկայացնող այլ հարցերի վերաբերյալ: Մենք խորապես երախտապարտ ենք ԱՄՆ-ի կողմից Հայոց ցեղասպանության զոհերի ոգեկոչման և, իհարկե, Արցախի (Լեռնային Ղարաբաղի) բնիկ հայ քրիստոնյաների ժողովրդավարական ձգտումներին ձեր աջակցության համար»,- ասված է Հայ դատի Վաշինգտոնի գրասենյակի տնօրեն Արամ Համբարյանի հայտարարության մեջ։
Հավելենք, որ որպես ԱՄՆ ներկայացուցիչ՝ Թուլսի Գաբարդը համահովանավորել է Հայոց ցեղասպանության բանաձևը և 2017 թվականին մեկնել է Արցախ, որտեղ անձամբ ականատես է եղել ադրբեջանական ագրեսիան դիմակայող հայ բնակչության տոկունությանը։
Բացի այդ, 2020 թվականին նա դատապարտել է Թուրքիայի դերը Արցախի դեմ պատերազմ հրահրելու գործում՝ հայտարարելով, որ «Թուրքիան Ալ-Քաիդայի հետ կապված իր վստահված անձանց է ուղարկել Լեռնային Ղարաբաղի հայ բնակչությանը ոչնչացնելու համար»։
Թարգմանությունը՝ Տաթև Ֆռանգյանի
