Թրամփն ասում է, որ ցանկանում է բանակցել, բայց Իրանին «ծնկի բերելու» փաստաթուղթ է ստորագրում․ Փեզեշքիան

Իսլամական հեղափոխության 46-րդ տարեդարձի կապակցությամբ ունեցած ելույթում Իրանի նախագահ Մասուդ Փեզեշքիանը հայտարարել է, որ Իրանի ժողովուրդը 46 տարի առաջ այս օրը երկրից վտարել է բռնակալներին և կեղեքիչներին, փոխանում է IRNA-ն։

«Մեր հաղթանակի և հաջողության փիլիսոփայությունն ու գաղտնիքը միասնությունն է, համախմբվածությունը և ժողովրդի ներկայությունը ասպարեզում։ Թշնամիները, երկրում պառակտում և տարաձայնություններ ստեղծելով, ձգտում են թուլացնել Իրանը, սակայն Իսլամական հեղափոխության առաջնորդի խոհեմությամբ ու իմաստությամբ և ժողովրդի ներկայությամբ նրանց երազանքը չի իրականանա։ Իրանի ժողովուրդը պինդ է կանգնել ահաբեկչության դեմ, և թշնամիների դավադրություններն իրականություն չեն դառնա»,- հայտարարել է նա։

Փեզեշքիանը, միաժամանակ, հերքել է ԱՄՆ նախագահ Դոնալդ Թրամփի պնդումը, թե բանակցություններ է փնտրում Իրանի հետ՝ մատնանշելով Վաշինգտոնի միաժամանակյա ջանքերը՝ խարխլելու Իսլամական Հանրապետությունը:

«Թրամփն ասում է, որ ցանկանում է բանակցել, բայց, միևնույն ժամանակ, ստորագրում է փաստաթուղթ, որը նախատեսում է բոլոր տեսակի դավադրություններ՝ ծնկի բերելու իսլամական հեղափոխությունը։ Նրանք ասում են, որ ցանկանում են բանակցել, բայց եթե դուք իսկապես մտադիր էիք բանակցել, ինչո՞ւ եք արել այս հիմարությունները»,- ասել է Պեզեշքիանը՝ նկատի ունենալով Վաշինգտոնի կողմից Իրանի դեմ «առավելագույն ճնշման» արշավը և Թրամփի կողմից այդ փաստաթղթի ստորագրումը։

Իրանի նախագահը քննադատել է ԱՄՆ-ի պնդումները, թե Թեհրանն ապակայունացնում է տարածաշրջանը՝ պնդելով, որ «Իսրայելը, ամերիկյան աջակցությամբ, անապահովության իրական աղբյուր է՝ ռմբակոծելով անմեղ մարդկանց Գազայում, Լիբանանում, Սիրիայում, Իրանում և այլուր»:

Անդրադառնալով իսրայելական ղեկավարների դեմ Միջազգային քրեական դատարանի (ՄՔԴ) գործին՝ պատերազմական հանցագործությունների համարլ, Փեզեշքիանը դատապարտել է ԱՄՆ-ին դատարանի դեմ քայլեր ձեռնարկելու համար։

«ԱՄՆ-ը պնդում է, որ խաղաղություն է ուզում, բայց ո՞վ է իրականում խարխլել տարածաշրջանը: Ո՞վ է պատասխանատու տարածաշրջանում տեղի ունեցած ջարդերի և ավերածությունների համար։ Աշխարհի ո՞ր ազատ մտածող մարդը հավանություն կտա կանանց, երեխաների և հիվանդների ռմբակոծությանը»,- հայտարարել է Իրանի նախագահը։

Թարգմանությունը՝ Էմմա Չոբանյանի