Թուրքիան և Եգիպտոսը համատեղ հայտարարությամբ մերժել են պաղեստինցիների տեղահանումը Գազայից

Թուրքիան և Եգիպտոսը դեմ են արտահայտվել պաղեստինցիներին իրենց հայրենիքից տեղահանելու կամ վտարելու ցանկացած ջանքերին՝ կոչ անելով Իսրայելին թույլատրել Պաղեստինի փախստականների հարցերով ՄԱԿ-ի գործակալությանը (UNRWA) շարունակել իր մարդասիրական գործողությունները: Անկարայում Թուրքիայի ԱԳ նախարար Հաքան Ֆիդանի և Եգիպտոսի ԱԳ նախարար Բադր Աբդելաթիի նախօրեի հանդիպումից հետո տարածված պաշտոնական հայտարարության մեջ ընդգծվում է UNRWA-ի դերի պահպանման կարևորությունը, միաժամանակ, Իսրայելին կոչ է արվում չեղարկել գործակալության աշխատանքը խաթարող իր որոշումները, գրում է Daily Sabah-ը։

Նշվում է UNRWA-ի դերը պաղեստինցի փախստականներին աջակցելու գործում:

Երկու երկրներն էլ վերահաստատել են իրենց ամուր աջակցությունը Պաղեստինի ժողովրդի դիմադրությանը, իրենց հողին կապվածությանը և օրինական իրավունքներին:

Նրանք դատապարտել են ցանկացած գործողություն, որն ուղղված է պաղեստինցիների տեղահանմանը կամ տեղափոխմանը, զգուշացնելով, որ նման միջոցները կվտանգեն տարածաշրջանային կայունությունը, կսրեն հակամարտությունը և կխաթարեն խաղաղության ու համագործակցության հեռանկարները:

Հայտարարությունը նաև վերահաստատում է երկու երկրների հավատարմությունը արդար և կայուն խաղաղությանը՝ հիմնված միջազգային իրավունքի, ՄԱԿ-ի բանաձևերի և երկու պետությունների լուծման վրա։

Փաստաթղթում ընդգծվում է Մերձավոր Արևելքում անկայունության արմատական ​​պատճառները վերացնելու անհրաժեշտությունը՝ 1967 թվականի հունիսի 4-ի սահմաններում անկախ Պաղեստին պետության ստեղծմամբ՝ Արևելյան Երուսաղեմ մայրաքաղաքով։

Թարգմանությունը՝ Էմմա Չոբանյանի