Գերմանիայի նախագահը Թուրքիա կայցելի՝ փորձելով ամրապնդել հարաբերությունները

Գերմանիայի դաշնային նախագահ Ֆրանկ-Վալտեր Շտայնմայերը երկուշաբթի սկսել է եռօրյա շրջագայությունը Մերձավոր Արևելք, որի ընթացքում նա հանդիպելու է Սաուդյան Արաբիայի, Հորդանանի և Թուրքիայի ղեկավարների հետ, գրում է DW-ն։

Ուղևորությունը հիմնականում կկենտրոնանա Սիրիայում անվտանգության փոփոխվող իրավիճակի, ինչպես նաև Գազայի հատվածում ներկայիս զարգացումների վրա։ Այս համատեքստում պետք է քննարկվի մարդասիրական օգնությունը ինչպես Սիրիային, այնպես էլ Գազային։ Ակնկալվում է, որ անդրադարձ կլինի նաև տարածաշրջանում Իրանի թուլացած դիրքերին և նախագահ Դոնալդ Թրամփի օրոք ԱՄՆ-ի արտաքին քաղաքականության փոփոխություններին:

Նշվում է, որ ուղևորությունն ի սկզբանե նախատեսված էր անցկացնել նոյեմբերին, սակայն հետաձգվել է՝ Գերմանիայի իշխող ձախակենտրոն կոալիցիայի փլուզման պատճառով:

Շտայնմայերը երկուշաբթի առավոտյան վայրէջք է կատարել Սաուդյան Արաբիայի Ռիադ քաղաքում։ Նա ծրագրում է հանդիպել թագավորության փաստացի կառավարիչ, թագաժառանգ Մուհամեդ բեն Սալմանի հետ:

Երեքշաբթի Շտայնմայերը կմեկնի Հորդանան, որտեղ կայցելի գերմանացի զինվորականներին Ալ-Ազրաք ավիաբազայում, որտեղ Բունդեսվերի զինվորները ծառայում են ԻԼԻՊ-ի ահաբեկիչների դեմ միջազգային պայքարի շրջանակներում։

Չորեքշաբթի նախատեսված է Շտայնմայերի հանդիպումը Հորդանանի թագավոր Աբդալլահ Երկրորդի հետ։ Շտայնմայերը շրջագայությունը կավարտի Թուրքիա այցով։ Չորեքշաբթի երեկոյան Անկարայում նախատեսվում են բանակցություններ Թուրքիայի նախագահ Ռեջեփ Թայիփ Էրդողանի հետ։ Թուրքիան, որտեղ ներկայում շուրջ 3,2 միլիոն սիրիացի փախստական կա, նկատել է Ասադի տապալումից հետո տարածաշրջանում իր ազդեցության մեծացումը, և ակնկալվում է, որ Շտայնմայերը Էրդողանի հետ կքննարկի պատերազմից տուժած երկիրը կայունացնելու ծրագրերը:

Շտայնմայերի գրասենյակը նշում է, որ նախագահն իր շրջագայության ընթացքում հստակորեն կներկայացնի Գերմանիայի շահերը տարածաշրջանում:

Ավելի վաղ թուրքական լրատվամիջոցները, վկայակոչելով գերմանական դիվանագիտական աղբյուրներին, հայտնել էին, որ Բեռլինը ձգտում է Անկարա այցի միջոցով բարելավել հարաբերությունները Թուրքիայի հետ։ Շտայնմայերը Սիրիայում ներառական գործընթացը կարևոր է համարում և ձգտում է խթանել համագործակցությունը Թուրքիայի հետ։

Թարգմանությունը՝ Էմմա Չոբանյանի