20.02.2026 | 11:28
Պատվիրե՛ք IDBank-ի Arca Classic քարտ և օգտվե՛ք մինչև 2% հետվճարի հնարավորությունից
Բաքուն հայտարարել է ահաբեկչական խմբավորման բացահայտման մասին․ խմբի 8 անդամ ոչնչացվել է, 6-ը՝ կալանավորվել
Քաղաքականություն
03.02.2025 | 12:51
Ադրբեջանի Պետական անվտանգության ծառայության և Ներքին գործերի նախարարության աշխատակիցները համատեղ միջոցների արդյունքում ահաբեկչական սադրիչ գործողություններ են բացահայտել՝ ճնշելու երկրի տարածքում միջազգային ահաբեկչական կազմակերպությունների հետ կապված ծայրահեղ կրոնական խմբավորումների անդամների անօրինական գործողությունները։ Այս մասին ասվում է Ադրբեջանի Պետանվտանգության ծառայության հայտարարության մեջ։
Նշվում է, որ օպերատիվ-հետախուզական միջոցառումներով պարզվել է, որ «Անտառային եղբայրներ» ահաբեկչական խմբավորման գործունեությանը մասնակցելու համար դատապարտված Գադիր Հաջիևը հանցավոր հարաբերությունների մեջ է մտել Գուսարի շրջանի բնակիչներ Քամրան Քերիմխանովի, Ումուդ Գյուլալիևի, Վալերիկ Ադիլովի, Ռիադ Սաֆարալիևի, Ռովշան Լաչինովի, Նազիմ Զաքիևի և մյուսների հետ՝ ահաբեկչական հարձակումներ ծրագրելով Գուսարսկի շրջանում։ Այդ նպատակով ստեղծվել են ստորգետյնա թաքստոցներ Խիլ, Ջիբիր և Յասաբ գյուղերի անտառային տարածքում, ապահովվել է զինամթերքի, պայթուցիկների, տեխնիկական սարքավորումների և այլ միջոցների մատակարարում։
Խմբի անդամ Ալիփաշա Քամիլովը զինված դիմադրություն է ցույց տվել Գուսար քաղաքում հատուկ նշանակության ջոկատի սպաներին՝ թաքստոցից նետելով ձեռքի նռնակ, ինչի հետևանքով վիրավորվել է հատուկ նշանակության ջոկատի զինծառայողներից մեկը։ Քամիլովը ոչնչացվել է։
Ջիբիր գյուղի մերձակայքում գտնվող անտառապատ տարածքում իրականացված օպերատիվ-որոնողական և քննչական գործողությունների արդյունքում էլ հայտնաբերվել են գաղտնի ապաստարաններ և պահեստարաններ։ Անօրինական զինված խմբի անդամներ Գադիր Հաջիևը, Ռիադ Սաֆարալիևը, Վալերիկ Ադիլովը և Ումուդ Գյուլալիևը, որոնք զինված դիմադրություն ցույց տվել, ոչնչացվել են։
Խիլ գյուղում էլ հայտնաբերվել և դիմադրության ընթացքում ոչնչացվել են Նազիմ Զաքիևը, Քամրան Քերիմխանովն ու Ռովշան Լաչինովը։
Ըստ հաղորդագրության՝ հիմքեր կան նաև ենթադրելու, որ Գուսարի շրջանի բնակիչներ Շարաֆադդին Մահմուդովը, Էթիբար Ահմեդովը և այլք մասնակցել են զինված խմբի գործունեությանը, այդ թվում՝ այդ զինված խմբին պայթուցիկներ ու սարքավորումներ մատակարարել։
Նշված խմբի անդամներին՝ Էթիբար Ահմեդովին, Ռագիմ Միրզաբեկովին, Դավիթ Ռաշիդովին, Շարաֆեդին Մահմուդովին, Աբու Գյուլ Բաբաևին և Էլչին Ալիրզաևին մեղադրանք է առաջադրվել Ադրբեջանի քրեական օրենսգրքի 28.214.2.1, 28.214.2.3, 28.214.2.6 հոդվածներով։ Նրանք կալանավորվել են։
Թարգմանությունը՝ Էմմա Չոբանյանի
