30.04.2026 | 12:50
Ռոնալդուն՝ սաուդյան լիգայի մասին․ «Ես շատ վատ բաներ եմ տեսնում, սա այլևս ֆուտբոլ չէ»
ԵԽԽՎ նախագահը զգուշացրել է Վրաստանին վեհաժողովից դուրս գալու հետևանքների մասին
Քաղաքականություն
31.01.2025 | 20:18
Եվրախորհրդի Խորհրդարանական վեհաժողովի նախագահ Թեոդորոս Ռուսոպուլոսը հայտարարել է, որ Խորհրդարանական վեհաժողովից Վրաստանի դուրս գալը միայն վատթարացնելու է իրավիճակը հենց Վրաստանի համար։ Այդ մասին նա լրագրողներին հայտարարել է Ստրասբուրգում՝ Վեհաժողովի ձմեռային նստաշրջանի ավարտից առաջ, փոխանցում է Korrespondent-ը։
ԵԽԽՎ-ում համագործակցությունը դադարեցնելու վրացական իշխանությունների որոշումը որակվել է «աննախադեպ» և կազմակերպության սկզբունքների խախտում։
«Վեհաժողովը հաստատել է վրացական պատվիրակության լիազորությունները, ուստի՝ նրանք պետք է աշխատեն ԵԽԽՎ-ում: Դա Եվրոպայի խորհրդի անդամ երկրի իրավունքը չէ, այլ պարտավորությունն է»,- պարզաբանել է Ռուսոպուլոսը:
Ստրասբուրգը Թբիլիսիին զգուշացրել է հնարավոր հետևանքների մասին։
«Մենք այդ մասին ազդանշաններ ենք ուղարկել վրացական պատվիրակությանը։ Առայժմ նրանց մի քանի շաբաթ ժամանակ ենք տալիս (իրենց դիրքորոշումը փոխելու համար)։ Բայց եթե փոփոխություններ չլինեն, ես լուծում կառաջարկեմ մինչև ապրիլ», – ավելացրել է նա։
Հավելենք, որ ԵԽԽՎ-ն հավանություն է տվել Վրաստանի իշխանությունների դեմ պատժամիջոցներ սահմանող բանաձևին եւ նրանցից պահանջել է սկսել արտահերթ խորհրդարանական ընտրությունների գործընթաց՝ ԵԽԽՎ վերահսկողության ներքո։ Դրանից հետո վրացական պատվիրակությունը հայտարարել է, որ դադարեցնում է աշխատանքը Եվրախորհրդի խորհրդարանական վեհաժողովում, սակայն երկիրը կմնա Եվրոպայի խորհրդի անդամ։
Թարգմանությունը՝ Տաթև Ֆռանգյանի
