Թուրքիայի ՊՆ-ն հայտարարել է, որ շարունակելու է Սիրիայում քրդական խմբավորումների դեմ գործողությունները

Թուրքական բանակը կշարունակի «կանխարգելիչ և ոչնչացնող միջոցներ» ձեռնարկել բոլոր «ահաբեկչական կազմակերպությունների», հատկապես, քրդական PKK/PYD/YPG/SDF-ի և ԻԼԻՊ-ի դեմ, որոնք սպառնում են Սիրիայի ամբողջականությանը, ինչպես նաև Թուրքիայի խաղաղությանը և հանգստությանը։ Անադոլուի հաղորդմամբ՝ այս մասին ճեպազրույցում հայտարարել է Թուրքիայի ՊՆ պաշտոնական ներկայացուցիչ Զեքի Աքթյուրքը։

«Մենք կրկնում ենք, որ թույլ չենք տա որևէ ահաբեկչական խմբավորման ներկայություն կամ «կատարված փաստ» իրավիճակ տարածաշրջանում»,- ասել է նա՝ նշելով, որ Անկարան կշարունակի իր ջանքերը՝ «զարգացնելու Սիրիայի պաշտպանական և անվտանգային կարողությունները և ապահովելու սիրիացիների կամավոր, անվտանգ և արժանապատիվ վերադարձն իրենց հայրենիք»:

Թուրքիայի ՊՆ աղբյուրները մեկնաբանել են նաև գերատեսչության պատվիրակության այցը Սիրիա։ Նշվել է, որ դա ռազմական գերատեսչության պատվիրակության առաջին այցն է Սիրիա, ինչն առանձնահատուկ նշանակություն է տալիս դրան։

Այցի ընթացքում քննարկվել են «երկու երկրների համար վտանգ ներկայացնող ահաբեկչական կազմակերպությունների դեմ պայքարը, ինչպես նաև պաշտպանության և անվտանգության հարցեր»։

«Այն բանից հետո, երբ Սիրիայում պետական մարմինները սկսեցին գործել, մենք հայտարարել էինք, որ հանդիպում կանցկացնենք սիրիական կողմի հետ՝ պաշտպանության և անվտանգության ոլորտում համագործակցություն հաստատելու համար, ինչպես նաև կտրամադրենք անհրաժեշտ աջակցություն՝ համաձայն պատրաստված ճանապարհային քարտեզի։ Սիրիական նոր վարչակազմի և Սիրիայում ծառայող մեր ստորաբաժանումների հրամանատարների միջև շփումները շարունակվում են։ Մեր խորհրդակցությունները կշարունակվեն՝ համաձայն այն կարիքների, որոնք կառաջանան առաջիկա ժամանակաշրջանում»,- ասել են աղբյուրները։

Հավելենք, որ Անկարան քրդական խմբավորումներն ահաբեկչական է համարում։

Թարգմանությունը՝ Էմմա Չոբանյանի